DILI, 30 outubru 2023 (TATOLI) – Diretór Ezekutivu iha Klínika Bairo Pite, Inacio dos Santos, dehan pasiente HIV/SIDA hamutuk 242 ne’ebé halo tratamentu rutina iha klínika refere, hosi totál ne’e iha mós labarik kiik na’in-lima ne’ebé pozitivu, iha labarik feto rua no mane tolu.
‘’Totál kazu HIV-SIDA 242, iha labarik na’in-lima mak pozitivu, husi ne’e feto rua no mane tolu’’, Inacio dos Santos informa ba jornalista sira iha KBP, ohin.
Tuir nia, númeru kazu HIV/SIDA ne’ebé iha, balun tinan 10 ona maibé sira nafatin halo tratamentu.
“Ema ne’ebé mak moris ho HIV/SIDA, agora daudaun halo tratamentu iha Klínika Bairu Pite, hirak ne’e hamutuk 242, husi númeru sira ne’e mai husi tinan lima to’o tinan 10 nian mak mai tratamentu rutina iha ne’e”, nia rekorda.
Nia subliña, Klínika Bairo Pite rejista kazu foun ida iha fulan outubru, enkuantu iha agostu ho setembru la deteta kazu.
“Iha fulan agostu no setembru, ita la rejistu kazu, maibé iha fulan outubru mak ita rejista kazu foun ida”, nia relata.
Nia afirma, iha pasiente balun lakon tratamentu pesoál saúde sira kada fulan tolu iha munisípiu sira, hodi buka tuir kazu ne’e depois lori pasiente sira mai halo tratamentu.
“Depois iha fulan haat liuba ita iha kazu drop out kuaze na’in 11 maibé ita konsege hodi fila hotu, iha kazu na’in ida ka rua mak lakon kontaktu’’, nia hateten.
Nia haktuir kona-ba aimoruk antiretrovirál sufisiente hodi fó tratamentu ba pasiente sira ne’ebé mak moris ho HIV/SIDA.
Iha sorin seluk, Xefe Programa ba Moras Hadaet husi Relasaun Sexuál iha Ministériu Saúde, Bernardino da Cruz, konsidera sidadaun sira ne’ebé halai sees husi tratamentu hanesan risku ba transmisaun.
“Lakon husi tratamentu konserteza iha risku, tanba ita tenke hemu aimoruk hela de’it nia konseitu bainhira la deteta la transmisivel, bainhira ema ida hemu aimoruk ita koko ninia ran mak virus ne’e ita la deteta ne’e nia labele transmite ba ema seluk, ita imajina durante fulan tolu nia laran, nia la hemu aimoruk fó biban ba virus atu aumenta tan iha nia isin, signifika posibilidade transmite ba ema mós boot”, Bernardino konklui.
Notísia relevante : Timor-Leste rejista pasiente HIV/SIDA 1.704 no mate 271
Jornalista : Felicidade Ximenes
Editór : Zezito Silva
