DILI, 31 outubru 2023 (TATOLI) – Diretór Ezekutivu Klínika Bairo Pite, Inacio do Santos, hateten klínika ida-ne’e iha problema mak menus ekipamentu médiku.
“Difikuldade ne’ebé ita hasoru mak durante ne’e ita sei menus ekipamentu médiku no fasilidade seidauk adekuadu, entaun ami koko atu hadia no mellora liután ba oin hanesan sai fasilidade ne’ebé mak ijiéniku”, Inacio do Santos informa iha nia kna’ar fatin, ohin.
Nia dehan, ekipamentu médiku ne’ebé menus iha ne’e difikulta atu halo atendimentu ba pasiente sira.
“Ita-nia ekipmentu hanesan teste ran leokimia ita seidauk iha, entaun durante ne’e ita hasai ran iha ne’e tenke lori ba HNGV hafoin halo teste iha ne’eba, han tempu to’o loron haat ka lima mak iha rezultadu, entaun ida-ne’e mak ita hasoru”, nia esplika.
Nia relata, pasiente sira maioria konsluta iha KBP mesak ema kbiit laek no mai husi munisípiu sira entaun oinsá bele mellora ekipamentu sira ne’e atu bele fó asisténsia ne’ebé di’ak ba pasiente.
“Ha’u husu ba parte Governu tau atensaun uluk ba ekipamentu médiku tanba ita-nia pasiente sira ne’ebé mak mai konsluta iha ne’e mesak kbiit laek deit”, nia afirma.
Kona-ba finansiamentu, nia dehan KBP hetan apoiu másimu husi Servisu Apoiu Sosiedade Sivil Auditoriu Sosiál (SASCAS).
“Espera katak tinan oin SASCA nafatin tau orsamentu hodi apoia Klínika Bairo Pite atu la’o ho di’ak”, nia konklui.
Jornalista : Felicidade Ximenes
Editór : Zezito Silva
