Xefe Estadu esplika dezenvolvimentu TL ba Universidade Brunei Darusalam
DILI, 07 novembru 2023 (TATOLI) – Prezidente Repúblika, José Ramos Horta, hato’o palestra iha Universidade Brunei Darussalam, kona-ba dezenvolvimentu Timor-Leste nian, nune’e mós kooperasaun iha nível rejionál no internasionál sira.
Nota informativu ne’ebé Agência TATOLI asesu, ohin, katak aleinde prosesu dezenvolvimentu Timor-Leste nia, Horta mós subliña kona-ba papél Nasaun Unida nian atu reforsa iha Konsellu Seguransa Nasaun Unida relative ho konflitu mundiál ne’ebé akontese iha Myanmar, Russia ho Ukrania inklui Israel ho Palestina no seluk tan.
Ba kazu Myanmar nian, Prezidente Ramos-Horta konkorda no apoia tebes ba akordu ho pontu konsensu lima ASEAN nian (Five Point Consensus ASEAN) mak hanesan;
𝟏). Hapara imediata violénsia iha Myanmar.
𝟐). Kria diálogu konstrutivu entre parte relevante sira hodi buka solusaun pasífika iha Myanmar.
𝟑). Enviadu hosi ASEAN tenke fasilita prosesu mediasaun ba diálogu ho asisténsia hosi Sekretáriu Jerál ASEAN.
𝟒). ASEAN tenke fornese asisténsia umanitária liuhosi sentru asisténsia umanitária ba jestaun dezastre (AHA-centre sigla ingles).
𝟓). Enviadu espesiál no delegasaun ASEAN tenke vizita Myanmar hodi hasoru malu ho parte importante sira hotu ne’ebé involve hodi solusiona problema hotu iha Myanmar.
Nune’e, líder sira hotu iha ASEAN bele sente duni valór ba direitus umanus atu bele fó respeita tomak ba dignidade umana.
Partisipa iha palestra refere, membru Governu sira hosi Brunei Darussalam nian, estudante sira-ne’ebé estuda iha Universidade refere, reprezentante missaun diplomátiku sira no seluk tan.
Delegasaun hosi Timor-Leste mak kompostu hosi Vise Primeiru-Ministru, Francisco Kalbuadi Lay, Ministru Negósiu Estranjeiru no Kooperasaun (MNEK) Bendito Freitas Vise Xefe Estadu Maiór Jenerál Forsas Armadas, Majór Jenerál Calisto dos Santos ‘Coliati’, Embaixadór Timor-Leste ba Brunei Darussalam, Abel Guterres ne’ebé akompaña mós husi Embaixadór Brunei Darussalam iha Timor-Leste, Wan Hadfi Latif inklui autoridade lokal balun hosi Timor-Leste.
Jornalista: Hortencio Sanchez
Editór : Zezito Silva
