BOBONARO, 08 novembru 2023 (TATOLI) – Organizasaun Naun Governamentál Forum Komunikasaun Feto Timor Lorosa’e (FOKUPERS) hamutuk ho autóridade munisípiu Bobonaro, kuarta ne’e selebra loron nasionál feto (03/11) ba dala-47 ho atividade seminariu ne’ebé realiza ho tema ‘Hamutuk ita promove Maria Tapo nia obra hodi dignifika feto nia direitu fundamentál sira’.
Diretora ezekutivu FOKUPERS, Maria Fátima Perreira Guterres, esplika, objetivu hosi serimónia ne’e oinsá atu festeza hamutuk ho komunidade munisípiu Bobonaro kona-bá valór loron nasionál feto oinsá feto no komunidade sira bele hatene no koñese di’ak liután istória hosi eroína Maria Tapo no eroína sira seluk nia istória luta ba ukun rasik-an.
Liuhosi atividade ne’e mós hanesan parte atu bele enkoraja feto no komunidade munisípiu Bobonaro atu dignifika espíritu luta hosi eroína Maria Tapo no eroína sira seluk nune’e bele kontribui ba dezenvolvimentu nasionál.
Tuir nia, hafoin eroína Maria Tapo mate iha liña fogu, eroína sira hakerek karta ida ba Prezidente Repúblika, Saudozu Nicolau Lobato, katak ‘ami feto Tapo sei la rende no kontinua luta to’o ami nia raan turuk ikus nia”.
Notisia relevante: Komemorasaun Loron Nasionál Feto hodi valoriza Maria Tapo nia mate
“Ita hanoin katak atu tulun ita, oinsá ita bele hatene di’ak liután servisu maka’as luta eroína sira nian, bele kaer metin valór no prinsípiu sira-ne’ebé iha, tanba sira la husik hela mai ita kilat atu ita funu, maibé ita hanoin dehan klita ne’ebé ita presiza kontinua mak valór importante sira-ne’ebé iha katak presiza iha prinsípiu atu defende lialoos, igualidade ninian no prinsípiu atu halakon mukit hodi kontinua luta ba bem komún sosiál nian,” nia informa ba jornalista sira iha edifísiu administrasaun postu Maliana,
Reprezentante Prezidente Autoridade Munisípiu Bobonaro, Eurosia Maria Marques Doutel, agradese ba FOKUPERS ne’ebé mak hili munisípiu Bobonaro hodi selebra loron nasionál ne’e.
Atuál diretora Asaun Sosiál,autoridade munisípiu Bobonaro ne’e,konsidera liu hosi selebrasaun ne’e bele motiva feto Bobonaro hatutan prinispiu aten brani ne’ebé eroina Mari Tapo no eroina sira dedika ona nasaun Timor-leste.
“Nia obra mak s aten barani, responsablidade no domin ne’ebé ida sai hanesan motivasaun ida hodi enkoraja ita feto hotu espesiál ba feto Bobonaro atu banati tuir hahalok aten barani ida ne’e iha nivél ka aspeitu hotu inklui iha uma-kain,” nia katak.
Oradór ba seminariu ne’e hanesan Eis Ministra Solidariedade Sosiál, Domingas Alvez, Paulino Viegas Tilman hakerek na’in istória eroína Maria Tapo no Prezidente Komisaun F iha Parlamentu Nasionál, Deputada Maria Barreto ‘Gorumali’.
Portantu partisipa iha atividade ne’e eis deputada V legizlatura, Domingas dos Santos, estrutura asosiasaun feto potensiál munisípiu Bobonaro, reprezentante feto hosi instituisaun estadu no organizasaun sosiedade sivíl sira.
Notísia relevante: Maria Tapó-joven sira ne’ebé mate hatudu eroizmu loloos
Jornalista: Sérgio da Cruz
Editór: Evaristo Soares Martins
