DILI, 07 novembru 2023 (TATOLI) – Prezidente Repúblika, José Ramos Horta, dehan iha ona empreza internasionál rua hosi nasaun Xina no Kwait ne’ebé interesadu atu parseria ho Governu Timor-Leste hodi dezenvolve Kampu Greater Sunrise hodi bele lori pipline mai Timor-Leste.
“Tempu besik ita bele hetan ona akordu ho Austrália oinsa atu dezenvolve Greater Sunrise, uluk ita iha pregunta boot, tanba atu dada kadoras hosi Greater Sunrise mai Timor-Leste ho orsamentu boot tebes tanba tenke gasta billaun 10-18, maibé ita iha ona investór rua hosi Xina no Kwait sira prontu atu kontribui hamutuk ho Governu atu dezenvolve Greater Sunrise”, Horta hateten iha Brunei, ohin.
Nia dehan, bainhira Timor-Leste ho Austrália iha ona akordu metin hodi dezenvolve kampu Greater Sunrise mak Governu bele kontakta tan investór rua ne’e hodi ko’alia oinsa investe osan hamutuk ho Governu Timor-Leste.
“Empreza hosi Xina foin lalais mai ne’e ha’u mak konvida ema ho totál 30, sira hosi kompaña hamutuk 60 iha Xina, sira mós ko’alia ho maun Xanana katak sira prontu atu halo investimentu iha petroleum Timor-Leste nian. Kona-ba kompaña boot ida hosi Kwait sira mai dalabarak ona iha Timor-Leste hasoru malu ho ha’u, sira hakarak investe billaun ba billaun hodi dezenvolve kampo Greater Sunrise”, Horta refere.
Nia dehan, bainhira hakarak dezenvolve duni kampu Greater Sunrise mak Timor-Leste tenke lalais mobiliza investór sira hodi halo investimentu.
Jornalista: Hortencio Sanchez
Editór : Zezito Silva
