EDUKASAUN, BOBONARO, HEADLINE, MUNISÍPIU

EBF Oho-Ana iha Raiheu kondisaun grave

EBF Oho-Ana iha Raiheu kondisaun grave

Kondisaun Ensinu Báziku Filiál (EBF) ne’ebé lokaliza iha aldeia Oho-Ana, suku Raiheu, postu administrativu Cailaco, munisípiu Bobonaro. Imajen Tatoli/Sérgio da Cruz.

BOBONARO, 21 novembru 2023 (TATOLI) – Eskola Ensinu Báziku Filiál (EBF), aldeia Oho-Ana, suku Raiheu, postu administrativu Cailaco, munisípiu Bobonaro, daudaun ne’e kondisaun grave tanba infraestrutura ne’ebé governu anteriór konstrui iha tinan 2009 liuhosi projetu pakote referemdu kuaze aat no lahuk hotu ona.

Koordenadór EBF Oho-Ana, José Marcal, heteten kondisaun eskola ne’e diifikulta tebes prosesu ensinu no apredizajen iha tempu udan liuliu akontese anin-boot.

Notísia relevante: ME sei konstrui-reabilita eskola 15 iha Bobonaro inklui EBC Tapo

“Ha’u nia hanoin maka tempu udan, hanesan anin ka lae, ami iha-ne’e anin-boot, kuandu tempu udan mak anin boot mai, ami ho labarik sira-ne’e, keta iha sala laran maka monu tán, ita haree ai sira-ne’e nehek-mutin sa’e haan ai sira-ne’e at hotu ona,” nia informa ba jornalista sira iha kna’ar-fatin, segunda ne’e.

Nia haktuir, problema ne’e sempre hato’o beibeik ba parte Servisu Munisipál Edukasaun Bobonaro liuhosi relatóriu kada-fulan no parte nasionál mós mai halo ona levantamentu dadus, maibé to’o agora seidauk iha rezultadu.

Alende problema kondisaun eskola, EBF ne’e mós enfrenta problema kona-bá menus rekusu umanu atu akompaña estudante sira.

“Profesór ami na’in-tolu, maibé ida moras agora kuaze atu tinan ida ona, hatama beibeik relatóriu iha sentru ne’ebá la toma atensaun, nia la tama besik tinan ida ona, ne’e mak iha-ne’e ha’u mak ka’er primeiru no segundu anu hotu, ha’u la’o ba mai de’it, ne’ebé ha’u  husu IX Governu atu aumenta tán profesór tanba iha-ne’e labarik barak,” Koordenadór ne’e katak

Xefe suku Raiheu,Ventura Maria Tai, husu ba Ministériu Edukasaun atu tau-matan ba eskola ne’e ho karáter urjénsia, tanba ho kondisaun infraestrutura eskola ne’e bele fó ameasa ba estudante no profesór sira-nia vida.

“Ami sente triste oituan no ta’uk, bainhira eskola oan ho profesór iha laran, aula la’o hela anin-boot eskola ne’e atu monu tán. Ida-ne’e presaun liu ba ita nia-oan no profesór sira, tanba ai sira mós komesa lahuk hotu,” nia hateten.

Eskola ne’e akumula estudante ensinu báziku no pre-eskolar hamutuk 70 ho totál profesór ensinu báziku na’in-tolu no pre-eskolár ida.

Notísia relevante: MEJD prevee millaun $2,4 hadi’a sala eskola 21 iha Bobonaro

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!