Oscar Lima kongratula Governu atuál lori investór sira

DILI, 23 novembru 2023 (TATOLI) – Emprezáriu timoroan, Oscar Lima, ne’ebé partisipa iha forúm Internasionál Business, kongratula IX Governu Konstitusionál ne’ebé lidera hosi Primeiru-Ministru Kay Rala Xanana Gusmão tanba bele realiza atividade internasionál no partisipa hosi emprezáriu internasional hamutuk ema 252 hosi nasaun hamutuk 28.“Ha’u kongratula ba IX Governu Konstitusionál liuliu ba Vise Primeiru-Ministru Francisco Kalbuadi Lay ne’ebé realiza forúm ida-ne’e, tanba tuir ami emprezáriu privadu katak forúm sira hanesan ne’e importante tebes tanba lori ema hosi rai liur mai atu halo investimentu iha nasaun ida-ne’e”, Oscar Lima dehan ba jornalista sira iha Bebora, ohin.

Maske nune’e, nia husu ba ema hotu atu kria pás no estabilidade iha Timor-Leste atu bele gaña ema internasionál sira hodi mai investe iha Timor-Leste hodi aselera dezenvolvimentu ne’ebé la’o hela.

“Primeiru ita tenke kria lai pás iha nasaun ida-ne’e, atu nune’e empreza hosi rai liur bele mai investe tanba ema mai ne’e lori ema nia osan, se ita la kria pás mak ema tauk atu mai investe iha ita-nia nasaun”, nia hatete.

Nia informa, durante forúm ne’e konversa ho emprezáriu internasionál sira ne’ebé partisipa iha forúm ne’e hakarak investe iha Timor-Leste maibé sira sei mai halo uluk estudu viabilidade hodi hatene sitauasaun no lei sira iha Timor-Leste.

“Sira hakarak atu mai halo investimentu, maibé sira sei mai uluk halo estudu viabilidade, sira sei mai haree ita nia lei sira kona-ba rai keta iha problema karik, lei kona-ba investimentu ne’e forte ka lae no buat balu tan”, nia friza.

Tanba ne’e, nia husu ba Governu atu kria lei investimentu no rai nian ne’ebé forte atu nune’e bele fó oportunidade ba investór sira brani hodi investe iha Timor-Leste.

Jornalista: Hortencio Sanchez

Editór : Zezito Silva