TL selebra akordu investimentu 10 ho empreza internasionál
DILI, 24 novembru 2023 (TATOLI) – Vise Primeiru-Ministru no Ministru Koordenadó Asuntu Ekónomika no Ministru Turizmu Ambiente Francisco Kalbuadi Lay, hatete Forum Intrenasionál Business. Timor-Leste (TL) konsege asina akordu hamutuk 10 ho empreza internasionál sira ne’ebé partisipa iha forú referidu.
“Atividade ne’e la’o di’ak tebes, haksolok tebes tanba empreza nasionál sira hamutuk ho Governu konsege asina akordu 10 ho investór internasionál sira”, Kalbuadi dehan ba jornalista sira iha Salaun GMN Bebora, ohin.
Akordu hirak ne’e TL selebra dahuluk ho Xina iha área komérsiu indústria tanba Xina mai ho delegasaun ne’ebé boot ho emprezáriu 50-resin ne’ebé tau hamutuk osan atu harí Ótel ho andar lima (bintang lima) no sentru konvensaun ne’ebé ho estandar internasionál iha Timor-Leste.
Aleinde ne’e, empreza Xina mós hamutuk ho Ministériu Komérsiu Indústria atu bele loke fábrika masi-midar. Xina mós selebra akordu ho Governu oinsa atu investe iha área peska.
Enkuantu Empreza Singapura asina akordu rua ho Timor-Leste iha áre negósiu no empreza Kamboja asina akordu kona-ba oinsa atu loke fábrika kosmetik.
Nune’e mós, asina akordu voo aviaun komersiál entre empreza timoroan Lourenso Atauro ho empreza Indonezia oinsa atu hametin liután kooperasaun iha aero nian.
“Ita sente kontente, tanba foin mak hahú investór barak mak interesante tebes hakarak investe, ita sei mantein halo kontaktu ho empreza internasionál sira atu mai investe barak iha ita nia rai”, Kalbuadi afirma.
Aleinde akordu 10 ne’e, iha mós asosiasaun ida hosi Xina fó apoiu karreta ambulánsia hamutuk 12 no sei harii Ospital ida iha Timor-Leste no sei fó bola estudu ba timoroan hamutuk 100 atu ba eskola iha Xina iha área médiku, otelaria, ospitalidade no seluk tan.
Nia dehan, selebrasaun ba akordu hotu ona, Governu sei servisu makas nune’e bele realiza akordu hirak ne’e hodi fó benefisiu ba povu no nasaun.
Jornalista: Hortencio Sanchez
Editór : Zezito Silva
