DILI, 27 novembru 2023 (TATOLI) – Prezidente Repúblika (PR), José Ramos Horta, admite katak ema ne’ebe hili vokasaun sai profesór iha Timor-Leste tenke simu realidade tanba enfrenta difikuldade iha sira-nian moris.
“Infelizmente ha’u haree imi (profesór) sira-nian moris difísil loos. Husi imi-ninia kondisaun, imi-nian vensimentu, imi-nian alimentasaun, saúde buat hotu ladún trata ho didi’ak. Ne’e tanba imi hili fali vida sai nu’udar profesóR”, Ramos Horta dehan iha ámbitu kondekorasaun ba profesór na’in-86, iha Palásiu Preziensiál, Bairru Pité, ohin.
Nia salienta katak, antes ne’e, maka profesór sira hili dalan sai deputadu ruma karik parese sira-nian moris la sai difísil hanesan ohin loron ne’e.
“Dalaruma iha serimónia sira hanesan ne’e nadodon mai ho karreta Prado to’o fatin mak laiha de’it atu para. Tanba sira hili ona dalan hodi sai profesór, ohin iha serimónia ne’e sira balun tenke mai ho Mikrolet, balun fali mai ho tiga roda, balun tan parese atu dulas de’it tiga roda mós forsa la to’o ona tanba katuas liu ona. Seluk fali la’o ain de’it tanba kondiasaun saúde la permite ona atu sae karreta”, realsa.
Tuir Ramos Horta, bainhira haree didi’ak dedikasaun ema ida nian sai nu’udar manorin ne’e buat ida valór liu iha mundu ne’e. Tanba husi dedikasaun profesór sira-nian maka bele forma ema ida sai matenek no bele sai ema importante iha nasaun ida, maibé iha nasaun ne’e seidauk iha tratamentu ida adekuadu ba manorin sira.
“Iha Parlamentu Nasionál agora tama ona VI lejislatura. Deputadu sira kontinua diskute sira-ninia direitu atu hetan subsídiu ba transporte no saúde, maibé profesór sira to’o ohin loron ninia direitu atu hetan subsídiu sira hanesan ne’e limitadu tebes. Tanba ne’e, IX Governu tenke haree asuntu ne’e ho sriu hodi bele trata kondisaun di’ak ba profesór sira atu iha futuru bele iha mekanizmu di’ak hodi rezolve profesór sira-nian moris”, sujere.
Ho kondisaun ne’ebé maka profesór sira enfrenta dauduan ne’e bele sai referénsia ida ba manorin sira ne’ebé hili ona dalan ne’e, hanesan vokasaun ida tanba hakarak kontribui ba dezenvolvimentu hodi prepara ema atu konstrui nasaun ne’e.
“La buat ida, tanba ida ne’e maka ema ida-idak ninia eskolla nu’udar vokasaun, maibé fiar katak profesór na’in-86 ne’e entrega ona sira-nian moris tomak hodi sai manorin tanba hakarak kontribui ba dezenvovimentu umanu hodi konstrui Estadu demokrátiku atubele sai nasaun ida dezenvolvidu”, dehan.
Xefe Estadu parabeniza profesór sira no hato’o obrigadu ba kontribuisaun sira ne’ebé durante ne’e sira fó ona ba Timor-Leste.
Notísia relevante: Profesór 86 ne’ebé dedika aan iha era tolu hetan ona kondekorasaun husi Estadu
Jornalista: Tomé Amado
Editora: Maria Auxiliadora
