OÉ-CUSSE, 27 novembru 2023 (TATOLI) – Ministru Interiór, Francisco Guterres, hateten, veteranu sira iha obrigasaun morál no devér atu kontinua apoia Governu hodi dezenvolve Timor-Leste.
Ministériu Francisco Guteres, hato’o nia esperansa ne’e, iha ámbitu serimónia atribuisaun kondekorasaun medalla orden Nicolau Lobato no medalla ordén funu na’in iha otél Ambeno Oé-Cusse, segunda ne’e.
“Parabéns ba veteranu sira, tanba depois Timor-Leste liberta tiha, ita-boot sira, kontinua nafatin kontribui ba rai ida-ne’e, balun F-FDTL, PNTL, no institusaun oioin, kontinua kontribui, tanba iha obrigasaun morál no devér ida atu lori rai ida-ne’e ba di’ak ninian,” nia fó hanoin.
Nia relembra, iha veteranu barak, sei ajuda nafatin Estadu Timor-Leste, bainhira iha problema ruma, veteranu sira apoia hodi kontribui ba pás no estabilidade.
“Ha’u ko’alia tanba iha krize 2006, veteranu hamriik hodi hamate hela krize ida-ne’ebé atu fahe Timor ba rua, veteranu sira hamriik ajuda Estadu, hodi hametin no suku fali kanek sira-ne’ebé mosu iha 2006,” Governante ne’e relembra.
“Tan ne’e, ha’u reprezenta Primeiru Ministru nia naran, fó parabéns bai mi hotu no husu kontribui atu ajuda nafatin Estadu, atu dezenvolve rai ne’e ba oin, nune’e bele hatutan hanoin sira, mehi sira-ne’ebé, uluk ita-nia aman no maun alin sira, habelar ona, hanesan jerasaun foun, ne’ebé mai hetan benefísiusiu hosi ita-nia ukun rasik-an ida-ne’e,” nia apela.
Sekretáriu Rejionál ba Asuntu Administrasaun, Martinho Abani Elo, reprezenta Autoridade RAEOA, agradese no espera ho prezensa membru Governu sira iha oé-Cusse bele lori korajen di’ak ba povu Oé-Cusse.
“Ha’u lori Autorifdade nia naran, agradese ba Governu Sentrál, mai asiste direita kondekorasaun ba kombatente sira iha Oé-Cusse, ami agradese tanba ho prezenza membru Governu mai RAEOA, atu fó korajén no motivasaun ba povu Oé-Cusse atu unidade bele buras ba beibeik,” nia orgullu.
Notísia relevante: Sekretáriu Estadu Veteranu husu joven sira mantein pás no estabilidade
Jornalista: Abílio Elo Nini
Editór: Evaristo Soares Martins
