Sekretáriu Estadu Veteranu husu joven sira mantein pás no estabilidade
DILI, 10 novembru 2023 (TATOLI)–Sekretáriu Estadu Veteranu (SEV), Cesár dos Santos da Silva, husu ba joven sira atu iha komemorasaun masakre Santa Cruz ba dala-32 ne’e, nafatin mantein pás no estabilidade.
“Ha’u husu ba joven sira atu nafatin mantein pás no estabilidade ba rai doben ida-ne’e, tanba xave ba dezenvolvimentu Timor-Leste mak imi joven loriku asawa’in sira,” Sekretáriu Estadu ba Veteranu (SEV), Cesár dos Santos da Silva, hateten ba Agência Tatoli iha nia kna’ar fatin, Caicoli, sesta ne’e.
Tanba, nia dehan, akotesimentu masakre ne’ebé akontese iha semitériu Santa Cruz iha 12 novembru 1991 ne’e, juventude Timor-Leste maiória mak oferese sira-nia aan hodi fakar raan no mate hasoru inimigu sira hodi luta ba ukun rasik-aan.
“Ha’u husu ba juventude loriku asswa’in ne’ebé mak partisipa manifestasaun pasifiku iha 12 novembru 1991 nian, ne’ebé simu orientasaun hosi komandu da luta hodi oferese sira-nia aan ba mate. Joven sira hatudu brani hodi halo manifestasaun iha momentu ne’ebá no inimigu sira simu ho tiru kilat,” nia hateten.
Tuir nia, akontesimentu pasadu iha masakre 12 novembru 1991 ne’e sai istória ba joven sira iha Timor-Leste, nune’e presiza prezerva memória pasada ne’e hodi husik hela ba jerasaun foun sira atu moris banati.
“Ohin loron, 10 novembru, hela loron rua tan masakre Santa Cruz halo ona tinan 32. Tanba ne’eduni, ha’u husu mate restu 12 Novembru no joven hotu-hotu atu motiva nafatin ho espíritu vontade hodi selebra loron 12 novembru ho di’ak. Maibé tenke asegura no prezerva nafatin istória akontesimentu pasadu nian,” nia dehan.
Prezidente Komité 12 Novembru (C12N), Gregório Saldanha, hateten joven sira presiza valoriza no dignifika lutadór sira-nia luta hodi kontribui ba pás no estabilidade ba rai doben Timor-Leste.
Nia dehan, komemorasaun 12 Novembru ne’e atu fó valór ba ita-nia lutadór sira tanba sira-nia luta mak ohin loron timoroam goza ukun rasik-aan, nune’e husu ba ema hotu tenke respeita no valoriza sira-nia luta.
“Hanesan daudaun ne’e, ita-nia joven ne’ebé mak halo krime ne’e signifka la fó valór ba lutadór sira-nia luta. Tanba ne’e, husu ba joven sira hotu atu lalika tan fakar raan entre joven timoroan. Husik rezisténsia nia ema mak sa vítima no lakon vida ba rai ida-ne’e. Nune’e, di’ak-liu utiliza tempu ne’e hodi moris di’ak no kontribui ba dezenvolvimentu ba rai ida-ne’e,” nia dehan.
Notísia Relevante: PNTL hahú investiga konfrontu Lourba no Carabau
Jornalista : Osória Marques
Editór : Cancio Ximenes
