Ministra Verónica fó pose ba membru kompozisaun suku 181 iha Baguia

DILI, 29 novembru 2023 (TATOLI)—Ministra Solidariedade Sosiál no Inkluzaun (MSSI), Verónica das Dores, tersa ne’e, fó pose ba kompozisaun suku hamutuk 181 iha postu administrativu Baguia, munisípiu Baucau.

Membru kompozisaun suku ba períodu 2023-2030 hamutuk 181 ne’e kompostu hosi xefe suku na’in-10, xefe aldeia nain-47, reprezentante juventude na’in -20, lia-nain 10 no delegadu ho delegada hamutuk 94.

Iha serimónia toma pose iha komemorasaun loron proklamasaun indenpendénsia ba dala-48 (28 novembru 1975-28 novembru 2023) ho tema “Celebrar a História e Construir o futuro” ne’e, nia sente onradu tanba Xefe Governu bele fó fiar ba nia hodi prezide toma posse ba kompozisaun suku ba períodu ida-ne’e.

“Momentu ida-ne’e la’ós de’it atu marka tempu hahú mandatu hosi sira hotu ne’ebé ohin simu pose. Maibé mós hatudu kompromisu ida-ne’ebé atu hatuur hikas fali prinsípiu hirak fundamentál ne’ebé sai hanesan riin ba ita-nia rejime demokrátiku. Objetivu hirak estratéjiku ne’ebé hatuur ona hosi ita-nia Governu, hodi promove dezenvolvimentu nasionál,” Ministra Verónica hateten liuhosi komunikadu ne’ebé Agência Tatoli asesu, kuarta ne’e.

Governante ne’e hateten, lider komunitáriu sira tenke hala’o kna’ar esensiál ida hodi harii sosiedade ida justu, inkluzivu no prósperu, liuhosi lideransa Governu nian.

Tanba, nia dehan, líder komunitária sira-nia kompromisu la’ós de’it atu kaer kna’ar ne’ebé simu ona, maibé tanba misaun lulik ida atu serbí no hatudu dalan ba ema hirak ne’ebé pertense ba  komunidade lokál,

Ho demokrásia ida-ne’ebé sei foun, lideransa komunidade mak kaer kna’ar ida sentrál tebes, bainhira atu haforsa valór demokratiku ne’e líder komunitáriu sira mak hala’o funsaun hanesan intermediáriu ne’ebé esensiál entre saida mak komunidade hakarak atu hetan no saida mak istituisaun sira iha Governu atu hala’o.

“Governu rekoñese kna’ar esensiál hosi líder komunitária sira hodi konkretiza objetivu estratéjiku sira, relasiona ho dezenvolvimentu nasionál ne’ebé hatur ona iha planu estratéjiku dezenvolvimentu nasionál 2011-2030. Bainhira hala’o estratéjia dezenvolvimentu ita tenke tau ba neon nesesidade sira espesífiku hosi komunidade. Hahú ohin ba oin, imi mak ema-ne’ebé hakna’ar-aan atu hamosu vizaun ne’e, imi mak sai responsável ba tradús polítika nasionál sira luan liu, hodi de’it imi-nia asaun konkretu ne’ebé bele benefísia diretamente ba komunidade ne’ebé imi reprezenta bá,” nia esplika.

Nia husu ba xefe suku empozadu sira atu haburas transparénsia, responsabilidade no envolve membru sira hotu bainhira atu foti desizaun ruma.

Timor-Leste ohin loron hasoru dezafiu oioin maibé iha futuru sei mosu oportunidade oioin, no dalan atu hakat ba dezenvolvimentu ida-ne’ebé sustentável no atu hala’o mehi sira iha nível nasaun nian, tenke mobiliza timoroan hotu-hotu ho esforsu ida de’it.

Hamutuk hateke ba futuru ho laran ida nakonu ho otimizmu, hodi tau iha ulun katak kada dezafiu ne’ebé hasoru no hakat liu ona, sei halo ema sai forte liután.

“Hodi Governu nia naran, hakarak agradese ba kompromisu ne’ebé mak ohin imi halo ona, atu imi-nia lideransa bele hakat tuir dalan integridade, responsabilidade, justisa no dedikasaun ba nasaun Timor-Leste. Husu mós ba Xefe Suku empozadu sira atu serbisu ho onestu, labele haree ba kór no partidu maibé tenke servisu ho responsabilidade hodi halo dezenvolvimentu liuliu haree ba nesesidade komunidade sira-nian iha postu Baguia rasik,” nia dehan.

Xefe Suku Samalari, Maria Soares, sente orgullu no onradu tebes sai hanesan xefe suku hodi lidera suku refere ho fuan no laran.

“Ha’u agradese ba ha’u-nia komunidade ne’ebé fó ona sira-nia votu ba ha’u hodi sai eleitu ba xefe suku no ba futuru ha’u sei kontinua serbisu ne’ebé iha ona. Tanba ne’e, ha’u husu ba komunidade atu hamutuk nafatin sai forsa ida de’it hodi kontribui ba dezenvolvimentu ba ita-nia rain. Ha’u sei serbisu hamutuk mós ho entidade hotu-hotu hodi hala’o dezenvolvimentu nasionál no lokál, liuliu atu kontribui ba dezenvolvimentu iha ha’u-nia suku rasik. Ha’u mai serbí, la’ós atu ukun,” nia hateten.

Jornalista : Osória Marques

Editór        : Cancio Ximenes