iklan

NASIONÁL, EKONOMIA, HEADLINE

PM Xanana apresia BCTL rejista labarik rihun 27 loke konta ‘Ha’u nia Futuru’

PM Xanana apresia BCTL rejista labarik rihun 27 loke konta ‘Ha’u nia Futuru’

Primeiru-Ministru, Kay Rala Xanana Gusmão. Imajen Tatoli/Francisco Sony

DILI, 29 novembru 2023 (TATOLI)Primeiru-Ministru (PM), Kay Rala Xanana Gusmão, apresia ho Banku Sentrál Timor-Leste (BCTL, sigla portugés) nia servisu finanseiru sira, tanba ne’e husu atu nafatin mellora servisu ba públiku, liu-liu ba introdusaun programa sira nune’e jerasaun foun sira bele hatene rai no poupa osan.

Xefe Governu nota katak durante ne’e, populasaun bainhira hetan osan, gasta barak, laiha hanoin atu rai no poupa, maibé ho Banku Sentrál nia programa bele hanorin sidadaun sira hori rai no poupa osan.

“Ha’u admira katak rihun 27 maka ho espíritu poupansa, ida-ne’e di’ak tebes. Timor tuir kultura osan gasta mak barak, simu oitoan gasta liu, deve tun-sa’e maibé ho programa sira ne’e ita hanorin daudaun. Ne’e duni BCTL kontinua nafatin atividade sira ne’e, liu-liu hanorin labarik no joven sira tanba sira mak importante liu,” Xanana hato’o iha ámbitu serimónia loron poupansa nasionál ba dala-sia no kampu dijitál ba dala-tolu, iha resintu Timor Plaza, kuarta ne’e.

Notísia relevante : BCTL selebra loron poupansa nasionál no kampu dijitál

Tanba ne’e, Xefe Ezekutivu iha hanoin, durante mandatu IX Governu nian sei hamosu mikro kréditu ba empreza kiik no médiu, tanba nia konsidera katak ukun-an sei la folin bainhira produtór sira la hetan netik osan iha liman no la hatene rai.

“Ne’e duni ha’u felisita imi-nia inisiativa di’ak ne’e. Ha’u husu atu hanorin nafatin literasia finanseira no dijitalizasaun finanseira. Tanba ne’e Governu tenke tau-matan ba sistema internet iha fatin hotu hodi bele ajuda populasaun, no hosi parte Governu saida de’it mak bele ajuda atu kria tan kondisaun, dehan mai para kria nafatin kondisaun ne’e,” Xanana tenik.

Biban ne’e, Primeiru-Ministru husu atu kuidadu ho seguransa tanba iha nasaun seluk ema matenek balun bele halo manobra hodi foti sai ema-nia osan sira iha banku.

“Programa poupa ne’e di’ak tebes tanba hanorin joven no estudante, inan no aman atu poupa, ida-ne’e importante tebes,” nia reforsa.

Iha biban hanesan, Governadór BCTL, Helder Lopes, informa, desde lansa loron poupansa nasionál iha tinan 2014 no bainhira lansa konta ‘Ha’u nia Futuru’, to’o ohin loron iha rejista ona konta hamutuk rihun 27.

“Ne’e signifika labarik rihun 27 maka iha ona konta ‘Ha’u nia Futuru’, Hosi totál konta ida-ne’e osan hamutuk millaun $13, signifika ita hahú iha ona konsiénsia katak poupansa ne’e importante ba ita-nia futuru. BCTL sei serbisu hamutuk ho instituisaun finanseira sira no Governu, liu-liu Ministériu Edukasaun hodi kontinua promove poupansa nasionál ba estudante sira tanba bainhira ita halo poupansa, maka ita asegura sira-nia futuru,” Helder dehan.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!