iklan

NASIONÁL, DILI, HEADLINE, SOSIEDADE SIVĺL

JSMP-The Asia Foundation lansa relatóriu peskiza kona-bá sistema justisa lokál iha TL

JSMP-The Asia Foundation lansa relatóriu peskiza kona-bá sistema justisa lokál iha TL

Imajen/Espesial

DILI, 05 dezembru 2023 (TATOLI)— Sistema Monitorizasaun Programa Judisiál (JSMP, sigla Inglés) no The Asia Foundation (TAF), tersa ne’e, hala’o lansamentu relatóriu peskiza kona-bá sistema justisa lokál iha Timor-Leste no diskusaun kona-ba oinsá haforsa asesu ba informasaun iha sistema justisa.

Objetivu hosi lansamentu relatóriu ne’e mak oinsá atu hatutan rezultadu hosi peskiza ne’ebé JSMP ho TAF halo ba entidade xave sira hanesan Governu, autór judisiáriu, sosiedade sivíl, ajensia polísia no entidade relevante sira seluk atu bele fó hanoin no buka mekanizmu ne’ebé apropriadu atu solusiona ba deskobrimentu sira hosi rezultadu peskiza ne’e ni’an liuliu iha haforsa asesu ba informasaun iha sistema justisa.

Peskiza ne’e, JSMP hala’o iha Munisípiu 7 (hitu) ho nia suku sira mak hanesan iha Munisípiu Covalima iha Suku Ogues ho Matai, Munisípiu Ermera iha Suku Samalete, Munisípiu Baukau iha Suku Uma-Ana-Ulu ho suku Soba, Rejiaun Administrativa Espesiál Oeukusi iha suku Lifau no suku Lalisuk, Munisípiu Dili iha Suku Dare no Munisípiu Aileu iha suku Fahe-Soi.

Entrevista ba ema 73, kompostu husi autoridade lokál no Polísia Nasionál Timor-Leste ne’ebé iha experiénsia ba rezolve disputa, autor judisiál, sosiedade sivíl no peritu sira.

“Maioria husi entrevistadora hateten vitima no lezadu no autoridade lokál sira la hatene prosesu legál no la komprende solusaun ikus ba sira nia kazu inklui xefe suku sira mós la hatene”, hatete Diretora Ezekutiva JSMP, Ana Paula Marçal,iha Fatuhada-Dili.

Diretora ne’e relata entrevistadu hateten arguidu no lezadu la hetan informasaun kle’an ba sira nia prosesu legál husi Polísia to’o iha Tribunál.

Peskiza ne’e atu Governu no autoridade lokál hodi halo armonizasaun Justisa komunitária no formál.

“Justisa komunitaria ka dalan rezolve problema sivíl no kriminál ne’e nia finansiamentu ka kustu bo’ot tebes. Rezultadu peskiza ejize mós atu Governu bele hadi’a sistema justisa iha Timor-Leste”, Diretora ne’e afirma.

Iha relatóriu peskiza ne’e hatudu katak vitima no lezadu la hetan informasaun ba sira nia prosesu ka andamentu iha prosesu legál, tanba ne’e mak rekomenda katak Governu presiza halo reforma ba iha setór judisiál liuliu rekursus umanu, infraestrutura no fasilidade servisu.

Iha lansamentu ne’e konvidadu xave sira ne’ebé hato’o sira ninia intervensaun maka hanesan: Lucia Lobato, hanesan Koordenadora Grupu Traballu Reforma Setór Justisa, Adjuntu Prokuradór Jerál Repúblika, Nelson de Carvalho, Provedór Direitus Umanus no Justisa, Virgilio Guterres), reprezentante hosi sosiedade sivíl hanesan AlFela, Belun no Pradet, advogadu privadu, PNTL, liña ministerial sira mak hanesan reprezentante hosi Ministériu Solidaridade Sosiál no Inkluzaun no DNPKK.

Lansamentu ne’e loke direita hosi Diretora Ezekutiva JSMP, Ana Paula Marçal no Heidi Arbuckle (Team Lider PASK), aprezentasaun sumáriu relatóriu hosi Eurosia de Fatima Almeida.

Partisipa iha lansamentu ne’e mak hanesan prokuradór, Xefe Gabinete Prokuradoria, ekipa Provedor Direitu Umanu no Justisa, reprezentante MSSI, DNPKK no mós parseiru sosiedade sivíl no mídia sira.

Lansamentu ne’e realiza ho apoiu orsamentu hosi Embaixada Nova Zelandia liuhosi The Asia Foundation iha Programa Apoiu Siguransa Komunitáriu (PASK).

Notísia relevante:JSMP observa prosesu formál ba kazu Violénsia Bazea ba Jéneru la’o lentu iha Tribunál

Jornalista : Jesuina Xavier

Editór        :  Florencio Miranda Ximenes

iklan
iklan

Leave a Reply

iklan
error: Content is protected !!