SEP dezloka ba Xina hodi hametin kooperasaun iha área peska
DILI, 05 dezembru 2023 (TATOLI) – Sekretáriu Estadu Peskas (SEP), Domingos da Conceição “Maucaro” tersa-feira ne’e, ho ekipa delegasaun dezloka ba Xina hodi hametin kooperasaun entre Timor-Leste ho Xina iha área peska nian.
“Vizita ne’e ho objetivu atu hametin kooperasaun entre Ministériu Agrikultura, Pekuária, Peskas e Floresta (MAPPF) Timor-Leste ho Repúblika Popular Xina bazeia ba karta konvite hosi Parseiru Hainan Zhongkai Ocean Fishery Group., LTD (ZOFG)”, hatete iha komunikadu ne’ebé Agência TATOLI asesu hosi media SEP, ohin.
Durante vizita, SEP sei haree servisu hamutuk hodi estabelese estratejia kooperasaun entre parseiru Peskas Repúblika Popular Xina ho Timor-Leste hodi dezenvolve setór Peskas Timor-Leste nian.
Sekretáriu Estadu ho delegasaun viajen ho Aviaun Aero Dili Timor-Leste (A320), vizita ne’e, durante loron liman, hahú 05-12 dezembru tinan ne’e.
Jornalista: Hortencio Sanchez
Editór : Zezito Silva
