EDTL identifika Bobonaro-Lolotoe fasil ahi mate-lakan
BOBONARO, 11 dezembru 2023 (TATOLI) – Eletrisidade Timor-Leste, Empreza Públika (EDTL,EP) Munisípiu Bobonaro, identifika bainhira akontese udan no anin-boot halo enérjia elértika iha postu administrativu Bobonaro no Lolotoe fasil tebes mate lakan tanba situasaun klima iha postu rua ladún di’ak.
Asuntu ne’e relata hosi Koordenadór EDTL,EP Munisípiu Bobonaro, Mário de Jesús, hodi responde ba preukupasaun públiku ne’ebé kestiona katak, enérjia elétrika iha Bobonaro-Lolotoe ne’e tanba saida mak udan no anin ahi sempre mate.
Notísia relevante: EDTL Bobonaro la deteta ligasaun ilegál durante sistema falla
“Ha’u atu klarifika de’it katak ahi iha postu Bobonaro no Lolot’e, ne’e kuandu udan ho anin nia sempre mate-lakan, tanba iha kestaun klima, anin-boot ita-nia poste balu tohar, udan rai-mamar mós nia monu, fiu sira mós monu, entaun automatikamente ahi mate, ami labele halo buat ida tanba natureza, ami só hein situasaun normál mak foin bele intervein,” nia informa ba Tatoli iha Maliana, segunda ne’e.
Jerente EDTL,EP Munisípiu Bobonaro ne’e fundamenta, bainhira akontese avaria iha fatin ruma difisil tebes atu hamoris fila-fali, tanba tékniku sira halo intervensaun iha terrenu ho sistema manuál.
Tanba ne’e, nia husu ba kliente atu pasiénsia tanba EDTL,EP laiha forsa atu hasoru natureza.
“Ita seidauk iha ekipamentu modernu liu, entaun ahi kuandu mate ami-nia tékniku sira tenke sai ba buka hosi ai-rin ba ai-rin mak foin bele deteta ninia kauza, depois mak foin bele halo intervensaun hodi normaliza fali ahí, ne’ebé ha’u atu klarifika kuandu ahi ne’e mate la’ós ami mak halo, ami hanesan Empreza Públika ami buka reseita, ne’ebé ami hamate ahi menutu ida deit mós ami lakon,” nia Katak.
Tuir dadus kliente EDTL,E.P iha munisípiu Bobonaro mai hosi suku 50, postu administrativu neen hamutuk 16,762.
Notísia relevante: EDTL fornese ona enerjia elétrika ba uma-kain 1,676 iha Bobonaro
Jornalista: Sérgio da Cruz
Editór: Evaristo Soares Martins
