BAUCAU, 11 dezembru 2023 (TATOLI) – Serbisu Munisipál Saúde Baucau kontinua implementa programa prevensaun moras dengue durante tempu udan iha munisípiu Baucau.
Diretór Serbisu Munisipál Saúde Baucau, Domingos Reinaldo Guterres, esplika, liuhosi programa dengue, serbisu saúde Baucau hahú prepara ekipa hodi halo prevensaun hanesan tama sai uma hodi fahe abate ba komunidade, liuliu tau iha tanki bee hodi hamate larva.
“Kuandu mosu ona kazu, hakarak ka lakohi pesoál saúde sira tenke ba halo fumigasaun ba fatin ne’ebé mosu kazu dengue,” Diretór Serbisu Munisipál Saúde Baucau hateten iha Vila Antiga, segunda ne’e.
Serbisu Saúde Baucau iha fulan-dezembru rejista ona kazu dengue hamutuk 18 ne’ebé akontese iha sentru saúde Baucau vila, Ostiku, Vemasse, Uaitame no Mulia.
Nune’e liuhosi ekipa tékniku direitamente tún ba terrenu hodi halo fumigasaun ba fatin hirak-ne’e nune’e bele prevene kazu dengue.
“Dengue bele akontese iha fatin ne’ebé de’it liuhosi susuk no hadaet tutan ba ema seluk,” Domingos Guterres akresenta.
Serbisu Saúde Baucau kontinua halo promosaun hanesan edukasaun saúde, fahe informasaun liuhosi maneira avizu iha Igreja, lideransa komunitária hotu nune’e komunidade infromadu hodi prevene moras dengue hanesan uza muskuteiru, limpeza jerál no hamaran fatin bee.
Jornalista : Natalino Belo
Editór : Evaristo Soares Martins
