iklan

EDUKASAUN, LIQUIÇÁ

Inauguradu Sentru Aprendijazen Komunitária iha Maumeta-Liquiçá

Inauguradu Sentru Aprendijazen Komunitária iha Maumeta-Liquiçá

KNTLU hamutuk ho Komisaun Nasionál Koreana ba UNESCO, Ministériu Edukasaun no líder lokál, ohin, inaugura Sentru Aprendijazen Komunitária, iha suku Maumeta, postu administrativu Bazartete, munisípiu Liquiçá. Foto Tatoli/Afonso do Rosário

LIQUIÇÁ, 12 dezembru 2023 (TATOLI) – Komisaun Nasionál Timor-Leste ba UNESCO (KNTLU) hamutuk ho Komisaun Nasionál Koreana ba UNESCO, Ministériu Edukasaun no líder lokál ohin inaugura Sentru Aprendijazen Komunitária (SAK) iha suku Maumeta, postu administrativu Bazartete, munisípiu Liquiçá.

Sekretáriu-Ezekutivu KNTLU, Luís de Fátima Soares, hatete  tuir Planu Estratéjiku Nasionál 2011-2030, presiza rezolve problema iliterasia/alfabetizasaun liuhusi estabelese SAK iha kada postu administrativu.

“KNTLU iha kompromisu bo’ot hodi apoiu Ministériu Edukasaun harii SAK ho objetivu fó oportunidade aprendizajen oioin liuhusi programa sira hanesan analfabetizmu no programa ekivalénsia nune’e bele kontribui ba hamenus taxa analfabetu no hadi’a kualidade edukasaun iha país ne’e”, nia afirma iha ámbitu inaugurasaun SAK, iha Liquiçá ohin.

Luís Soares haktuir katak KNTLU uza meius oioin hodi buka doadór sira ne’ebé iha kompromisu atu apoiu dezenvolvimentu edukasaun naun-formál iha Timor-Leste. Nia rekorda katak iha novembru 2019, KNTLU selebra ona nota entendimentu ida iha Seoul ho Komisaun Nasionál Koreana ba UNESCO hodi fó apoiu finanseiru ho valor millaun $1 ba implementa  Bridge Timor-Leste project durante tinan lima, ne’ebé hahú husi marsu 2020 to’o 31 dezembru 2024 no orsamentu refere aloka faseadamente kada tinan rihun $200.

“Husi alokasaun orsamentu ne’e, komisaun harii ona Sentru  Aprendizajen Komunitária sira, fornese materiál aprendizajen hanesan livru matadalan ba profesór, matadalan ba estudante, livru manual inglés, livru manual ba lian Korea, livru Matemátika, apoiu ba kursu sira kona-ba Programa Aprendizajen Alfabetizasaun, Programa Life Skills [abilidade da Vida], Programa Ekivalénsia no formasaun ba profesór sira, inklui selu saláriu ba funsionáriu no manorin sira”, dirijente esplika.

Tuir nia, KNTLU estabelese ona SKA 13 no tuir planu, sei estabelese tan sentru rua iha munsípiu Aileu no Ataúru iha tinan oin, ne’ebé sei sai hanesan tinan ikus ba implementasaun Bridge Timor-Leste Project iha faze dahuluk.

“Kolaborasaun entre nasaun rua [Korea-Sul ho Timor-Leste] liuhusi Bridge Timor-Leste Project sei kontinua promove direitu edukasaun ba ema sira ne’ebé esklui husi edukasaun formál no sai nu’udar ponte konkretu ba esperansa liuhusi edukasaun naun-formál sira”, nia konklui.

Nune’e mos representante Komisaun Nasionál Koreana ba UNESCO, Grace Kim, sente onrada tanba bele hola parte iha serimónia inaugurasaun sentru ida ne’e ho objetivu sei sai hanesan fatin aprendijazen ba foin sa’e sira.

Nune’e mos representante Komisaun Nasionál Koreana ba UNESCO, Grace Kim, sente onrada tanba bele hola parte iha serimónia inaugurasaun sentru ida ne’ebé sei sai hanesan fatin aprendijazen ba foin sa’e sira.

Grace Kim informa katak durante pandemia kovid-19 invade nasaun hotu iha mundu, halo labarik barak mak abandona sira nia eskola no balu lakohi ona atu kontinua sira nia estudu, nune’e inaugurasaun SAK ida ne’e hanesan “sinál esperansa” ne’ebé hatudu katak Timor-Leste iha kompromisu no determinasaun atu kontinua sentru aprendijazen naun-formál iha situasaun saida de’it.

“Asesu ba edukasaun ne’e direitu fundamentál ba ema hotu tanba konsagra ona iha UNESCO no Deklarasaun Iniversál Direitus Umanus. Inaugurasaun SAK Maumeta ne’e hanesan pasu importante ida hodi hametin direitu universál povu Liquiçá ni’an iha setór edukasaun”, nia afirma.

Korena ne’e akresenta, abertura SAK iha Maumeta hanesan rezultadu signifkativu husi esforsu no kolaborasaun entre Timor-Leste ho Korea-Súl liuhusi Bridge Timor-Leste Project hodi kontribui ba promosaun direitu asesu ba edukasaun  ne’ebé esklui husi edukasaun formál.

Iha fatin hanesan, reprezentante Ministériu Edukasaun, Diretór-Geral Edukasaun no Ensinu, Deolindo da Cruz, hatete ho inaugurasaun SAK ida ne’e sei ajuda ministériu liuliu ba Diresaun Nasionál Ensinu Recorrente hodi ajuda no fasilita sidadaun sira ne’ebé sei analfabetu hodi aprende hakerek, le’e no konta, tanba iha Timor-Leste taxa iliterasia sei kontinua eziste.

Dirijente ne’e akonsella ba foin sa’e sira ne’ebé la konsege finaliza sira nia estudu iha ensinu formál bele aproveita oportunidade aprende iha SAK ne’e hodi hetan diploma ekivalénsia husi Ministériu Edukasaun.

Administradór munisípiu Liquiçá, Pedro Paulo Gomes, iha nia diskursu, lori komunidade Liquiçá nia naran agradese ba Governu no povo koreanu ne’ebé fó ona apoiu hodi hari’i SAK ida ne’e hodi fó oportunidade ba populasaun iha suku Maumeta hodi aprende, tanba edukasaun la haree ba klase sosiál.

“Ami simu sentru ida ne’e sai hanesan fatin ne’ebé espesiál ba maluk sira ne’ebé seidauk hatene le’e no hakarek atu nune’e bele aprende no aumenta sira nia koñesimentu nune’e bele adapta ba mudansa teknolojia iha tempu atuál no iha futuru”, nia agradese.

Marka prezente iha eventu ne’e autoridade lokál, representante Polísia Nasionál Timor-Leste no no F-FDTL, dirijente edukasaun munisipál no nasionál, inklui populasaun iha suku Maumeta.

Notísia relevante: Sentru Komunitáriu Aprendizajen neen hetan subsídiu rihun $18 husi ME

Jornalista: Afonso do Rosário

Editora: Isaura Lemos de Deus

iklan
iklan

Leave a Reply

iklan
error: Content is protected !!