SECOMS husu media divulga informasaun saudável hodi prevene konflitu
ATABAE, 12 dezembru 2023 (TATOLI) – Sekretáriu Estadu Komunikasaun Sosiál (SECOMS, sigla portugés), Expedito Dias Ximenes, husu ba media hotu atu publika informasaun ne’ebé saudável hodi konsiensializa komunidade sira hodi prevene aan hosi konflitu.
“Tanba ne’e ohin ha’u mai koalia ho sira no iha ha’u nia aprezentasaun ba sira katak Sekretáriu Estadu Komunikasaun Sosiál konsidera papél mídia mak nafatin divulgasaun informasaun ne’ebé saudavél hodi konsiénsializa komunidade hodi hadook aan hosi konflitu, ida-ne’e importante”, Expedito Dias Ximenes, hateten ba jornalista sira hafoin oradór ba formasaun prevensaun konflitu komunitáriu iha Rai Robo, Postu Administrativu Atabe, Munisípiu Bobonaro, tersa ne’e.
Nia dehan, media sai parseiru estratéjiku Governu nian, atu kontinua emite informasaun ne’ebé loos ba públiku hodi kontribui ba pás no estabilidade iha rai-laran.
“Media nafatin sai parseiru ba Governu atu kontinua divulga informasaun saudavél hodi kontribui ba pás no prevene konflitu iha komunidade sira nia leet”, nia revela.
Nia salienta, joven formandu 300-resin ne’ebé Ministériu Interiór rekruta mak atu tún ba baze oinsá hamutuk ho autoridade lokál hodi buka halo mediasaun no rezolve problema sira iha sosiedade bainhira komunidade sira iha problema.
“Ha’u husu dala tán ba joven 300-resin ne’ebé Ministériu Interiór prepara ne’e tenke sai matadalan ba Governu hodi servisu hamutuk ho autoridade lokál no kamada sira iha suku atu rezolve duni problema”, nia hateten.
“Kuandu problema mosu iha suku ida, entaun ita tenke buka aproxima hodi prevene, nune’e prevene konflitu komunitariu atu labele mosu tán iha ita-nia sosiadade”, Expedito afirma.
Iha fatin hanesan, Asesór iha área Prevensaun Konflitu Komunitáriu Diresaun Nasionál iha Ministériu Interiór, Francisco Simões, hateten joven 300-resin ne’ebé rekruta ho objetivu atu prepara sira atu tún ba baze hodi servisu hamutuk autoridade lokál, komunidade atu halo prevensaun ba konflitu.
“Sira nian papél mak ne’e, kuandu iha bairro ida ka suku mak iha problema sira mak tún hodi halo mediasaun atu bele solusiona tiha problema, atu prevene konflitu hodi labele mosu tán iha bairro ka suuku”, nia dehan.
Nia dehan, formadór sira ne’e maihosi membru PNTL no durante formasaun materia ne’ebé formadu 300-resin aprende ne’e mak téknika mediasaun oinsá mak solusiona konflitu ne’ebé mosu iha bairro ka suku ida oinsá halo aproximasaun ho autoridade lokál no komunidade sira hodi halo prevensaun ba konflitu sira.
“Ita-nia joven sira ne’e tuir formasaun durante fulan ida, hahú hosi fulan kotuk no sei termina iha loron 18 fulan ida-ne’e. Sira aprende liubá matéria oinsá halo mediasaun no téknika prevensaun ba konflitu. Bainhira sira remata tiha sira-nia formasaun, ita sei koloka sira ba Diresaun Nasionál Konflitu Komunitáriu hosi Ministériu Interiór”, Francisco adianta.
“Ita sei destaka ema nain tolu ba kada Postu Administrativu ida para sira hahú halo sira funsaun oinsá tulun komunidade sira halo prevesaun ba konflitu komunitariu”, nia konklui.
Jornalista: Natalino Costa
Editór : Zezito Silva
