Espesialista Neofrolojia husu aumenta mákina fase ran ba pasiente infesaun
DILI, 14 dezembru 2023 (TATOLI) – Médiku Espesialista Neofrolojia hosi Hospitál Nasionál Guido Valadares (HNGV), Gustavo do Rosario da Cruz, husu atu aumenta mákina fase ran ba pasiente infesaun sira tanba la sufisiente.
“Mákina ne’ebé mak fase ran ba pasiente infesaun sira iha HNGV, ita-nia mákina ida de’it, tanba ne’e ita husu oinsá bele aumenta tan atu ita bele uza hodi halo tratamentu ba pasiente sira ho moras infesaun”, Gustavo do Rosario da Cruz, informa iha nia fatin HNGV, ohin.
Nia subliña, HNGV iha mákina jerál mós, hodi uza ba fase ran hamutuk 13, ida-ne’e sufisiente hela. Entaun durante ne’e pasiente ne’ebé mak fase ran rutina iha HNGV hamutuk 103 pasiente.
“Totál pasiente ne’ebé mak agora daudaun halo tratamentu fase ran iha HNGV hamutuk 103, husi númeru ne’e, iha pasiente foun ne’ebé mak ita rekolla hodi halo tratamentu fase ran hahú husi janeiru to’o agora hamutuk 72 pasiente”, nia haktuir.
Nia afirma, hosi janeiru to’o mai ohin loron, pasiente ne’ebé mak lakon vida iha 26, husi númeru rekolla tuir estatístika maibé pasiente balun labele rekolla tanba sira mate iha uma.
“Pasiente sira ne’ebé mak mate ne’e maioria pasiente sira mai ho kazu avansadu, ne’ebé ita labele salva sira-nia vida, tanba sira mai ho moras komplikadu, depois balun mai sira husu fila ba uma, depois mai fali ospitál ho komplikasaun ne’ebé aas, entaun labele salva sira-nia vida”, nia hateten.
Nia hatutan, pasiente sira ne’ebé mak fase ran hela, maibé sira husu alta pedidu hodi fila ba uma ne’e hamutuk 10.
“Pasiente sira ne’ebé mak agora daudaun fase ran ne’e maioria ho idade 40 ba leten husi pasiente feto no mane”. nia konklui.
Jornalista : Felicidade Ximenes
Editór : Zezito Silva
