Estudante 5.418 pasa ezame nasionál iha Baucau
BAUCAU, 14 dezembru 2023 (TATOLI) – Estudante hamutuk na’in-5.418 komposta hosi Ensinu Báziku Sentrál (EBC, sigla portugés) no Ensinu Sekundária Jerál (ESG, sigla portugés) pasa ezame nasionál iha munisípiu Baucau.
Diretór Serbisu Munisipál Edukasaun Baucau, Augosto Ornai Ximenes, esplika, hosi númeru refere kompostu EBC hamutuk 2.992 ho rezultadu aprovadu hamutuk 2.939 ka pursentu 98.5 no reprovadu hamutuk estudante 45 ekivalente pursentu 1.5.
Enkuantu ESG hamutuk estudante 2.336 ho rezultadu aprovadu estudante hamutuk 2.265 ka pursentu 98 no reprovadu estudante na’in-46 ka ekivalente pursentu 2, enkuantu Ensinu TÉkniku Vokasionál (ETV) hamutuk estudante 214 ne’ebé aprovadu pursentu 100.
“Ohin eskola iha munisípiu Baucau fahE rezultadu ezame ba estudante sira ho kategoria EBC no ESG nívél munisipál,” Diretór Serbisu Munisipál Edukasaun Baucau informa ba Agência TATOLI iha Vila Nova, kinta ne’e.
Serbisu Munisipál Edukasaun Baucau rekoñese ho rezultadu ezame nasionál ba tinan-2023 munisípiu Baucau persentajem pasajen redús bainhira kompara ho tinan-2022 tanba taxa reprovadu aumentu hamutuk estudante na’in-91 mak la pasa iha ezame nasionál.
Nune’e Augosto Ximenes enkoraja estudante ne’ebé la pasa ezame nasionál atu kontinua aprende iha tinan oin tanba prosesu aprenizajen sei la haree ba idade maibé nu’udar oportunidade atu kontinua estudu nune’e bele tuir fali ezame nasionál iha tinan-2024.
“Sei iha oportunidade, labele lakon esperansa ba sira-ne’ebé seidauk pasa iha ezame nasionál tanba desizaun iha sira-nia liman,” Augosto Ximenes akresenta.
Hosi rezultadu ezame nasionál munisípiu Baucau hola parte iha mellór klasifikasaun 10 kompostu ETV Dom Bosco Fatumaca okupa klasifikasaun daruak to’o dahaat, Eskola Sekundária Santo António (ESSA) iha klasifikasaun dahaat, klasifikasaun dalima no dahitu hosi ESG Reinu Venilale.
Munisípiu Baucau hamutuk EBC sia rejista estudante reprovadu no ESG neen mak estudante reprovadu kompostu ESG numéru 1, ESG numéru 2, ESG Aubaka, Afaça, Quelicai no Vemasse.
Jornalista : Natalino Belo
Editór : Evaristo Soares Martins
