Mate-isin sidadaun Xinés sei autópsia iha Indonézia
BOBONARO, 15 dezembru 2023 (TATOLI)- Mate-isin sidadaun Xinés ho naran Wu Mian ne’ebé mate iha área Silawan, munisípiu Belu, provínsia Nusa Tenggara Timur (NTT), Indonézia, daudaun ne’e autoridade seguransa Indonézia submete ona ba prosesu autópsia iha Atambua.
Administradór postu administrativu Balibo, Amilcar Tavares, esplika sidadaun estranjeiru ho estatutu mane idade tinan 50 ne’e autoridade seguransa Indonézia hetan iha loron (14/12), tuku 11:00 ne’e.
Mate-isin sidadaun estranjeiru ne’e hetan tanba hosi komunidade Balibo, Polisía Eskudra Balibo, Unidade Patrullamentu Fronteira (UPF), FALINTIL-Forsa Timor-Leste (F-FDTL) halo kooperasaun servisu hamutuk ho autoridade seguransa Indonézia no komunidade sira, hafoin lia-na’in sira iha Balibo halo tuir tradisaun kulturál.
“Ita hetan iha mota-laran ho kondisaun mate, agora iha Indonézia, tanba POLDA Indonézia, NTT hakarak halo autópsia iha-ne’ebá, ne’ebé to’o iha-ne’ebá ha’u la hatene ona, tanba iha área ema-nia,” nia ko’alia iha Maliana.
Sidadaun refere lakon iha tersa, loron 12 fulan-dezembru ne’e, maizumenus tuku 16:00 lokraik, bainhira hamutuk ho ekipa Autoridade Nasionál Minerál (ANM) halo hela estudu peskiza rikusoin Timor nia iha suku Cova, postu administrativu Balibo, munisípiu Bobonaro.
“Sira mai dehan ha’u, depois ba liu, maibé tuir ha’u-nia hatene sira ba moos la ko’alia ho katuas lia-na’in sira iha-ne’ebá, sira ba direita, entaun porvolta tuku 03:00 hanesan ne’e nia iha hela estrada ninin, kolega na’in-tolu mak sa’e ba liu metru 30. Inísiu atu ba ne’e nia lakohi, tanba nia kolen, depois sira foti sampel ne’e tún mai kolega ne’e laiha, sira buka moos la hetan, lakon kalan rua, loron rua mak foin hetan,” Amilcar haktuir.
Tuir nia, matebian la’o hamutuk ho nia maluk Xines-na’in tolu no timoroan balun.
Jornalista: Sérgio da Cruz
Editór: Evaristo Soares Martins
