Defisiénsia mentál maioria idade joven
DILI, 18 dezembru 2023 (TATOLI) – Xefe Departamentu Psikiatria, iha Hospital Nasional Guidu Valadares (HNGV), Boaventura da Costa, dehan pasiente moras mentál maioria hosi idade joven sira.
“Pasiente ho moras mentál maioria ho idade joven no kazu sira ne’e husi munisípiu Dili, maibé iha mós kazu balun ami simu husi munisípiu Baucau ne’ebé mak transferénsia barak husi ne’eba”, Boaventura da Costa informa iha nia kna’ar fatin Acute Care HNGV, ohin.
Nia dehan, hahú husi fulan janeiru to’o iha outubru mak pasiente ne’ebé mak mai konsulta iha OPD hamutuk 1.448, husi ne’e pasiente sira ne’e perdomina ho moras sira ne’ebé mak haree katak depresaun.
“Pasiente sira ne’e perdomina ho moras sira ne’ebé mak ita hatene katak ho depresaun mak maioria, depois tuir mai mak eskizofrenia, iha depresaun ne’e dalaruma pasiente mai ho oho aan, problema familiár no problema servisu sira”, nia afirma.
Nia esplika, husi janeiru to’o outubru, iha pasiente hamutuk 24 mak baixa tanba kazu sira ne’e mosu tanba iha problema família no problema ekonomia.
Tanba ne’e, nia husu atu aumenta rekursu umanu liuliu ba médiku psikolojia nian tanba daudaun ne’e médiku espesialista na’in-tolu, husi kubanu ida no timoroan na’in-rua, ida-ne’e seidauk sufisiente atu halo atendimentu ba pasiente moras mentál sira.
“Kazu ne’ebé sa’e makas liu mak depresaun, ne’ebé presiza psikolojia sira tanba ne’e parte importante ida, atu fó konselin no fó sikoterapia ba sira, oinsá bele rezolve problema família no problema ekonomia nian.
Nia husu mós atu aumenta espasu acute care tanba konsulta ida-ne’e iha referál sira la iha bainhira deteta ona pasiente ne’e moras mentál hodi halo transferénsia hotu mai iha HNGV.
Jornalista : Felicidade Ximenes
Editór : Zezito Silva
