Pesoál saúde na’in-rua ne’ebé destaka iha Lour sei termina kontratu
BOBONARO, 27 dezembru 2023 (TATOLI) – Postu saúde suku Lour, postu administrativu Bobonaro, munisípiu Bobonaro sei taka atendimentu saúde ba komunidade sira iha tempu badak tanba pesoál saúde na’in-rua hanesan enfermeira no saúde públika ne’ebé governu destaka iha fasilidade saúde ne’e sei termina kontratu iha loron 30 fulan-dezembru tinan 2023.
Xefe Sentru Saúde Bobonaro, Domingos Mesquita da Silva, informa, iha loron 30 fulan ne’e Pesoál Saúde na’in-13 hosi Programa Saúde iha Fámilia (SNF, sigla portugés) sei termina kontratu servisu ho governu.
Notísia relevante: La mantein kontratu Profisionál Saúde sei afeta ba vida pasiente
“Sira-ne’e para, ita-nia atendimentu saúde iha postu saúde Lour sei taka, tanba enfermeira no pesoal saúde iha-ne’ebá ne’e mós kontratadu, sira moos sei para. Ida-ne’e sei afeta ba ita-nia kobertura iha baze, depois defisil mós ba komunidade sira atu asesu ba fasilidade, entaun sira tenke halai mai iha Bobonaro, tanba atu Sibuni moos dook no ba Lepo moos dook,” nia ko’alia iha Maliana, tersa ne’e.
Jerente sentru saúde Bobonaro ne’e dehan, maske hasoru problema menus rekursu umanu, maibé iha postu saúde rua seluk hansan Sibuni sei iha enfermeiru na’in-tolu no Leber sei iha médiku na’in-ida atu halo atendimentu ba komunidade sira-ne’ebe presiza hetan tulun asisténsia saúde.
Domingos subliña, pesoál saúde hirak-ne’ebé sei termina kontratu ba konkore ona vaga ne’ebé Ministériu Saúde loke.
“Ita la hatene ne’e depende ba Ministériu Saúde, sira-ne’e atu mai fali ka ou ema foun mak mai fila-fali, espera sira sei mai fila-fali, tanba sira iha esperiénsia lubuk ida iha baze, ne’e ami sujere ba governu atu fó fali kontratu ba sira, tanba sira-ne’e ita lakon formasaun lubuk ida,” nia fó hanoin.
Enkuantu área kobertura ne’ebe sentru saúde Bobonaro halo atendimentu ba komunidade sira hosi suku sia hanesan; Molop, Sibuni, Lour, Leber, Tapo, Oe-leu, Mali-lait no suku Bobonaro Vila.
Notisia relevante: Profisionál saúde iha Sentru Saúde Cailaco la sufisiente
Jornalista: Sérgio da Cruz
Editór: Evaristo Soares Martins
