PM Xanana triste ho kazu Saburai
BOBONARO, 28 dezembru 2023 (TATOLI)-Primeiru Ministru, Kay Rala Xanana Gusmão, triste no preokupa ho akontesimentu joven na’in-lima falun oin metin hodi baku lisuk vítima Novelino Borges ho inan feto ida iha aldeia Kosal, suku Saburai, postu administrativu Maliana, munisípiu Bobonaro loron 25 fulan-dezembru.
Xanana konsidera aktu joven hirak-ne’e laiha morál no la repeita valór kulturál ne’ebé eziste iha nasaun ne’e.
Notisia relevante: Kazu Saburai, Suspeitu na’in-haat entrega aan ona ba polísia
“Kazu iha Saburai, joven sira tau tiha Ninja hodi baku ne’ebé sa’e motor, baku arbiru de’it. Ita-nia oan sira lahetene ona valór sira, la repeita malu ona, rona fali mak ema seluk nia orden,” Xefe Governu hato’o lamentasaun ne’e liuhosi serimónia Nahe Biti-Boot iha suku Karabau, kuarta ne’e.
Enkuantu suspeitu sira ho insiál P, S, F no insiál B ne’ebé molok ne’e hamutuk ho suspeitu JB baku vítima Novelino Borges iha motorizada leten entrega aan ona ba polísia.
Suspeitu na’in-haat ho insiál P, S, F no insiál B, iha kuarta lokraik, tuku 18:00 entrega aan ba Polísia Unididade Patrullamentu Fronteira (UPF), postu Lontama-Bobonaro.
Rekorda fali katak, suspeitu JB, P, S, F no insiál B halo agresaun fíziku hasoru vítima Novelino Borges akontese iha loron segunda (25/12) ne’e iha oras 11:00 dadeer, bainhira vítima Novelino Borges nia alin inklui nia avó feto ho motorizada marka Mio Beat ida halai iha dalan Saburai nian, derrepente joven na’in-lima taka oin metin ataka vítima Novelino Borges, hodi halo agresaun fíziku (baku) hasoru vítima Novelino Borges.
Suspeitu sira-nia asaun ne’e virál iha mídia sosiál Facebook no vítima sira ba hato’o keixa ba Komandu PNTL Bobonaro.
Notisia relevante: PNTL detein ona autór ida ne’ebé taka oin baku ema iha dalan área Saburai
Jornalista: Sérgio da Cruz
Editór: Evaristo Soares Martins
