Membru PNTL na’in-rua kandidatu forte ba adidu iha Bali-Singapura
DILI, 29 dezembru 2023 (TATOLI) – Ministru Negósiu Estranjeiru no Kooperasaun (MNEK), Bendito Freitas, hala’o enkontru ho kandidatu adidu no asistente adidu husi Diresaun Jerál Servisu Migrasaun Ministériu Interiór (MI) nian ne’ebé sei hala’o missaun iha Konsuladu Timor-Leste iha Bali-Indonézia no Singapura.
Kandidatu sira mak hanesan, Ajente Xefe Gregorio Soares Pinto nu’udar asistente adidu migrasaun bá Konsuladu Timor-Leste iha Bali Indonézia, no Primeiru Sarjentu Lindalva Beatriz da Costa Fernandes nu’udar Adida Migrasaun bá Singapura.
“Sorumutu ne’e hamutuk ho kandidatu adidu no asistente adidu sira hodi aprezenta karta asinatura despaixu ministeriál konjuntu bá sira-nia misaun ne’ebé sira sei hala’o hanesan adidu no asistente adidu migrasaun nian iha Bali-Indonézia no Singapura, tanba urjénsia”, hatete iha komunikadu ne’ebé Agência TATOLI asesu hosi media MNEK, ohin.
Nomeasaun bá adidu migrasaun ne’e efetua husi efeitu dispostu númeru 2 artigu 3 husi dekretu-lei númeru 37/2015, 30 setembru, no despaixu ministeriál konjuntu entre MNEK ho MI, kona-ba kolokasaun adidu migrasaun ne’ebé sei hala’o missaun hamutuk ho reprezentasaun misaun diplomátika Repúblika Demokrátika Timor-Leste nian iha Bali-Indonézia no Singapura.
Jornalista: Hortencio Sanchez
Editór : Zezito Silva
