Subsídiu millaun $5 fó ba IES privadu atu hadi’a kualidade
DILI, 29 dezembru 2023 (TATOLI) – Ajénsia Nasionál Avaliasaun Akreditasaun Akadémiku (ANAAA) konsidera planu no polítika Ministériu Ensinu Superiór, Siénsia no Kultura (MESSK) nian ne’ebé sei apoiu subsídiu fundu millaun $5 ba Instituisaun privadu sira ne’ebé konsidera di’ak tebes tanba atu ajuda mellora kualidade instituisaun sira ne’e.
Diretór Ezekutivu ANAAA, Nilton Paiva, apresia ho planu no polítika MSSK nian, ne’ebé sei tau fundu milaun $5 ba estabelesimentu privada sira hodi garante kualidade iha futuru.
“Ha’u konsidera Ministériu ninia planu no polítika ida ne’e di’ak tebes atu bele hadi’a frakeza sira ne’ebé maka IES privadu sira enfrenta hodi nune’e bele mellora di’ak liutan kualidade iha kada kursu sira,” Nilton ba Tatoli iha ninia servisu fatin Balide, ohin.
Tanba husi prosesu avaliasaun ne’ebé maka ANAAA halo identifika ona katak iha Instituisaun balun hatudu ona progresu tanba husi kursu 30 ne’e lubuk ida maka halo fali re-akreditasaun. Signifika, antes ne’e sira halo ona akreditasaun no agora sira hetan tan reakreditasaun atu hatene sira-nia progresu hodi nune’e bele mellora atividade letiva sira ba estudante sira ne’ebé maka envolve ka hili kursu refere.
Husi prosesu avaliasaun ne’ebé maka ANAAA halo daudaun ne’e konsidera iha kursu balun maka hatudu progresu no balun maka seidauk hatudu progresu.
“Ita halo avaliasaun ba kursu sira ne’e atu haree sira-nia progresu iha rekursu umanu. Infraestrutura, prosesu aprendizajen, rezultadu husi sira-nia graduasaun ne’e pelumenus estudante na’in hira maka hetan ona servisu no oinsá sira-nia esforsu hodi hadi’a no mellora liutan kualidade husi aprendizajen ne’ebé maka sira oferese ba estudante,” nia tenik.
Alende ne’e, ANAAA mós konsidera katak avaliasaun ba Instituisaun Ensinu Superiór Boaventura Timor-Leste (IBTL) ne’e haree hetan iha esforsu maka’as ne’ebé maka fundadór, edukadór no reitoriál sira halo ona ne’e duni bainhira prezensa ANAAA nian iha ne’ebá; sira hatudu duni progresu di’ak. Maibé, rezultadu hotu sei hein janeiru maka foin bele hatene.
“Ita haree husi sira-nia esforsu husi parte Fundadór, Edukadór no parte reitoriál nian sira hatudu duni vontade di’ak hodi mellora kualidade ba IBTL iha futuru,” nia haktuir.
Entretantu, rezultadu akreditasaun 2023 nian ne’ebé maka ANAAA halo ba kursu sei anunsia ba públiku iha loron 15 janeiru 2024.
“Ita-nia ekipa agora daudaun halo hela moderation ba kursu 30 ho Instituisaun ida ne’e tama ona ba finalidade tanba sei render ba rezultadu depois loron 15 janeiru 2024 maka sei anunsia ninia rezultadu loloos,” ezekutivu ANAA, Nilton Paiva informa.
Notísia relevante:ANAAA halo avaliasaun ba kursu Empreendedorizmu iha UNPAZ
Jornalista: Tomé Amado
Editór: Rafael Ximenes de A. Belo
