DILI, 03 janeiru 2024 (TATOLI) – Klínika Bairo-Pite rejista kazu foun pozitivu HIV/SIDA hamutuk hitu, iha dezembru 2023 nia-laran, aleinde kazu ne’e, iha mós kazu malaria ho totál 85, teben akuta 107, ispa 731, asidente tráfegu 40, maternidade 288, dengue 175, má nutrisaun 33 no moras kulit seluk hamutuk 1.339.
“Husi fulan dezembru ita rejista kazu foun HIV/SIDA hamutuk hitu no kazu sira seluk tan”, Diretór Ezekutivu Klínika Bairo Pite, Inacio dos Santos ba TATOLI iha nia kna’ar fatin Klínika Bairo Pite ohin.
Nia dehan, kona-na kazu má nutrisaun, Klínika Bairo-Pite la iha estoke suplementu nutrisaun hodi fahe ba labarik sira ne’ebé má nutrisaun maibé ho esforsu profisionál saúde sira-nia oinsá sensibiliza informasaun ba inan no aman sira atu prepara ai-han nutritivu ba oan sira atu bele rekupera husi sira-nia saúde.
“Agora daudaun ita-nia suplementu nutrisaun la iha hotu kedas, entaun difisil atu halo atendimentu ba labarik sira ne’ebé mak ho kazu má nutrisaun. Entaun ita motiva de’it inan no aman sira oinsá prepara ai-han nutritivu di’ak ba labarik sira atu bele rekupera fila fali hodi ba uma”, nia esplika.
Notiísia relevante : Klínika Bairo Pite: Labarik na’in-lima afeta HIV/SIDA hosi totál 242
Infografia: Timor-Leste rejista pasiente HIV/SIDA 1.704 no mate 271
Jornalista : Felicidade Ximenes
Editór : Zezito Silva
