TL-Cuba diskute programa prioridade rua
DILI, 05 janeiru 2024 (TATOLI) – Ministériu Juventude Desportu Arte no Kultura (MJDAK), Nelyo Isaac Sarmento, ne’ebé akompaña hosi Sekretáriu Estadu Arte no Kultura (SEAK), Jorge Cristovão, reune ho Embaxadóra Cuba iha Timor-Leste Grisel Alina Aldama Inniss hodi diskute kona-ba programa prioridade rua iha área desportu no arte kultura.
“Ita iha programa prioriade rua ne’ebé tenke servisu hamutuk ho Embaxada Cuba, programa hirak ne’e mak arte kultura no desportu ne’ebé presiza atu dezenvolve no mellora liután iha parte hotu”, Ministru Nelyo dehan ba jornalista sira iha edifísiu MJDAK Lecidere, ohin.
Nia esplika, iha área arte kultura sei haruka joven timoroan ba eskola iha Cuba atu eleva liután koñesimentu iha arte nian.
“Tinan hira ba kotuk ita iha ona estudante lubuk ida ba aprende iha Cuba, sira balu fila ona no daudaun ne’e servisu hela iha Sekretáriu Estadu Arte Kultura, entaun ba tinan ida-ne’e ita hakarak kontinua ba oin tan tanba ita nia planu sei iha tan akademia ba múzika no asuntu biblioteka nian entaun ita presiza rekursu ne’ebé naton parte ida mak ita halo kooperasaun ho Governu Cuba para atu bele simu ita-nia joven sira atu ba estuda iha ne’ebá”, nia hatete.
Nia rekorda, kona-ba kooperasaun iha área desportu iha tinan kotuk, Cuba apoiu ona profesór hamutuk na’in-neen mai hanorin estudante timoroan sira iha Universidade Nasionál Timor-Lorosa’e (UNTL), Fakuldade Desportu no estudante hirak ne’e gradua ona iha área desportu.
“Profesor Cuba sira mai hanorin estudante sira iha UNTL iha fakuldade desportu agora sira gradua ona hamutuk ema 50 liu, entaun sira ne’e mak sei sai futuru profesór desportu iha Timor-Leste, entaun ida-ne’e mak kooperasaun iha área desportu ita kontinua la’o nafatin”, nia friza.
Nia hatutan, profesór Cubanu hirak ne’e la’os de’it hanorin iha UNTL maibé sira tulun mós MJDAK hodi trasa planu estratéjiku oinsa atu lori desportu ne’e ba komuniade timoroan hotu.
“Ita hatene katak desportu agora la’os de’it oinsa atu hetan prestasaun maibé oinsa orienta ona ita nia populasaun abitua ho atividade desportiva nune’e bele kuidadu saúde”, nia relata.
Iha fatin hanesan, Embaxadora Cuba iha Timor-Leste Grisel Alina Aldama Inniss hatete, Cuba ho Timor-Leste kontinua servisu hamutuk iha arte kultura no desportu.
“Cuba nafatin loke dalan ba joven timoroan sira atu ba eskola iha ne’ebá tanba ita-nia relasaun metin tebes, ami prontu apoiu nafatin Governu Timor-Leste iha área desportu no arte kultura nian”, Embaxadora ne’e dehan.
Tanba ne’e, Governu Cuba ho Governu Timor-Leste sei asina memorandu ida iha tempu badak hodi hametin liután kooperasaun iha área arte kultura nian.
Jornalista: Hortencio Sanchez
Editór : Zezito Silva
