DILI, 06 janeiru 2024 (TATOLI)–Ministériu Interiór (MI) destaka mediadór na’in- 80 hosi Diresaun Nasionál Prevensaun Konflitu Komunitária (DNPKK) bá munisípiu no postu administrativu hodi haklaken polítika ministériu nian liga ba prevensaun konflitu.
Ministru Interiór, Francisco da Costa Guterres, hateten, mediadór sira ne’ebé koloka ona kompostu hosi Koordenadór postu 67 no munisípiu 13, ne’ebé sei serbisu hodi promove pás no estabilidade iha rai-laran.
“Ami rekruta ita-boot sira atu identifika sinál konflitu, apoia halo sosializasaun ba prevensaun konflitu iha munisípiu idak-idak nian hodi kontribui ba pás no estabilidade. Karik identifika komunidade iha indísiu krime, imi-nia papel ida mak asume responsabilidade foti dadus halo mediasaun no relata hodi prevene tanba seguransa la’ós Polísia de’it maibé ba ema hotu,” Ministru hateten, liuhosi nota ne’ebé Agência Tatoli asesu, sábadu ne’e.
Notísia relevante : MI orienta planu ezekusaun orsamentu no programa
Nia konsidera durante ne’e sosializasaun kona-ba prevensaun konflitu menus, tanba ne’e pesoál sira ne’e bele halo knaar ida-ne’e.
“Foin lalais Primeiru-Ministru hafoin hasoru malu ho Prezidente Republika, fó parabéns ba ajente seguransa no defeza inklui jovem sira tanba mantein estabilidade iha rai-laran. Primeiru-Ministru hateten, seguransa tenke metin nune’e dezenvolvimentu bele la’o. Ida-ne’e hatudu seguransa hanesan pilár importante no ida-ne’e dezafia imi sira ne’e atu serbisu di’ak ba nasaun,” nia ankoraja.
Tuir governnate ne’e, mediadór sira sei apreende di’ak liután hosi Ofisiál Polisiamentu Suku (OPS), lia-na’in no veteranu sira, atu nune’e bainhira hasoru konflitu iha ida-idak ninia munisípiu bele rezolve ho di’ak.
“Ha’u halo ona koordenasaun ho Ministériu Administrasaun Estatál kona-ba ita-boot sira ne’ebé koloka iha munisípiu 12 inklui RAEOA, sei halo kolaborasaun ho liña ministeriál sira hanesan líder autoridade komunitária sira, inklui Polísia Nasionál Timor-Leste ( PNTL) atu serbisu hamutuk halo sosializasaun prevesaun ba konflitu no iha kazu ruma tenta halo mediasaun atu evita labele iha konflitu fíziku ba malu,” nia tenik.
Molok termina sesaun, governante ne’e husu ba mediadór sira bainhira serbisu iha terrenu tenke nafatin imparsiál, la haree ba grupu, kor, rasa, étniku, relijiaun, no klase sosiál ka ekonomia, rona no respeita hodi kumpre orientasaun ho disiplina.
“Entre imi sira ne’e sei sai líder nasaun no sai matadalan ba povu hodi hatudu dalan ba povu, tanba ne’e tenke tau imi-nia an didi’ak asegura pás tanba ita estabelese rede mediasaun hodi dezenvolve rekursu prinsipál ida iha komunidade nia le’et hodi kontribui ba pás no estabilidade,” nia konklui.
Jornalista : Hortêncio Sanchez
Editora : Julia Chatarina
