DILI, 11 janeiru 2024 (TATOLI)—Governu liuhosi TradeInvest atribui ona deklarasaun benefísiu ba empreza haat iha jullu to’o dezembru 2023.
“Iha mandatu IX Governu nian lidera hosi Primeiru-Ministru, Xanana no tutela ba Vise-Primeiru Ministru Kalbuady Lay, hosi loron 01 jullu to’o dezembru ami simu empreza ne’ebé submete nia proposta investimentu mai hamutuk 14, ne’ebé hosi númeru ne’e atribui deklarasaun benefísiu ba empreza haat,” Diretór Diresaun Promosaun Investimentu TradeInvest Timor-Leste, Ezaquiel da Costa Babo, informa ba Agência Tatoli, iha ninia knaar fatin, Colmera, kinta ne’e.
Empreza haat ne’e mak hanesan, dahuluk, The Lodge Hotel, Unipessoal Lda ne’ebé re-investe ho totál kapitál investimentu millaun $25 hodi harii otél fitun 4, motel, shop office no fasilidade club house, lokaliza iha suku Comoro, postu administrativu Dom Aleixo, munisípiu Dili.
Daruak mak GOTA bebida e alimentos, Lda hanesan empreza lokál ne’ebé re-investe ona iha setór prosesamentu indústria bee hemu ho kapitál investimentu millaun $7,4 ne’ebé ezekuta ona millaun $3,450 hodi sosa ekipamentu mákina modernu ba produsaun bee no aloka ba sira-nia atividade operasionál seluk.
“Empreza ne’e kontinua ezekuta tan kapitál investimentu to’o millaun $7,4 ne’ebé aprezenta ba Governu hodi finaliza fábrika produsaun bee minerál ho marka GOTA ho medida volume oin-oin iha botir hanesan 240 ml, 330 ml, 600 ml, 1500 ml no litru 18,9. Investimentu fábrika bee lokaliza iha aldeia Mane-Mori, suku Ulmera, postu administrativu Bazartete, munisípiu Liquiçá,” nia akresenta.
Notísia relevante : TradeInvest no empreza Tsuneishi Shipbulding identifika rai iha Laleia harii estaleiru
Datoluk mak Discovery Business Industrial Zone, Lda hanesan empreza estranjeiru ne’ebé propoin iha ninia planu investimentu kompromete atu re-investe ho totál kapitál investimentu millaun $8-$10, iha indústria bebida alkoólika espesifikamente iha fábrika produsaun tua scotch Whisky no Highland Legend, ne’ebé ezekuta ona millaun $1,3 hodi sosa ekipamentu mákina modernu no atividade operasionál seluk. Investimentu ne’e lokaliza iha Fomento II Comoro, postu administrativu Dom Aleixo, munisípiu Dili.
Deklarasaun benefísiu dahaat mak atribui ba empreza Patricia Fresh Lounge, Unipessoal, nu’udar empreza lokál ne’ebé planu atu investe ho totál kapital $213.380 iha indústria bebida alkoólika tua manas, hahán, xokolate, surisu lokál no seluk-tan.
“Empreza ne’e hahú ezekuta $90.000 ba ekipamentu no sosa matéria-prima hodi prodús tua, xokolate no surisu. Investimentu ne’e lokaliza iha postu administrativu Dom Aleixo, munisípiu Dili,” Jerente tenik.
TradeInvest Timor-Leste durante períudu fulan-neen mandatu IX Governu promove no fasilita ona empreza exportadora sira hodi esporta sira-nia produtu ba merkadu rejionál no globál.
Empreza haat mak exporta kafé hanesan empreza Cocomau/PARCIC exporta kafé ho kuantidade tonelada 4,9 bá Japaun, empreza Kafé Orgániku Atsabe exporta kafé bá Austrália tonelada 14 no Inglatera tonelada 19. EMpreza Alter Trade Timor exporta kafé ba nasaun Austrália tonelada 10 ba no Xina tonelada 36.
Empreza Acelda exporta mina kamí ba nasaun tolu hanesan kamí tonelada 26 ba Amérika (Hawai) tonelada lima bá Xina no Amérika (Boston) tonelada 1,5. Empreza Tryaswars exporta produtu kutulak tonelada 24 bá Indonézia no empreza Cottonii exporta Budu-tasi tonelada 25 bá Indonézia.
“Atu dehan katak, kafé mak sai hanesan produtu exportasaun prinsipál Timor-Leste nian, ne’ebé produtu hirak seluk hanesan mina kamí orgániku, budu-tasi maran no kutulak. TradeInvest sei kontinua tau atensaun ba produtu hirak ne’e nomós sei promove dezenvolvimentu produtu sira seluk ba merkadu rejionál no globál atu nune’e bele kontribui liután ba diversifikasaun ekonomia liuhosi hasa’e kresimentu exportasaun,” nia salienta.
Jornalista : Antónia Gusmão
Editora : Julia Chatarina
