DILI, 15 janeiru 2024 (TATOLI)- Klube futeból AD SLB Laulara sai terseiru lugár iha Tasa Timor CUP 2023 ne’ebé realiza Melbourbe-Austrália.
Iha jogu ne’e klube Futeból Northen Crocs hosi Austrália sai kampiaun iha kompetisaun taxa Timor CUP 2023 no segundu lugár okupa hosi Klube Casuarina Darmina.
Notísia relevante: Kay Olok Cs lori AD SLB ‘ukun’ Craigieburn Pythons ho golu 11
Enkuandu hosi klube feto nian úniku klube rua de’it maka partisipa no Klube Feto Timor Leste United mak primeiru lugár no segundu lugar Northern Crocs Womens.
Hafoin jogu ekipa Komisaun Organizador Timor CUP entrega kedas tasa no medalla ba manán na’in sira hodi simu ho agradese festaza vitória ne’ebé sira hetan.
Iha jogu ne’e, Komisaun Organizadora Timor CUP mós entrega prémiu ba Jogador Estrala Benfika Laulara, Kay Olok Gusmão nu’udar jogador ho golu barak liu.
Jogadór estrela klube AD SLB Laulara Kay Olok Gusmão marka golu neen durante hasoru klube Craigieburn Pythons ho eskore 11-1 , Kay -Olok hatama golu lima no jogu hasoru Klube Timor-Leste Galaxy United hatama golu ida.
AD SLB Laulara sai hanesan ekipa favoritu iha jogu ikus faze grupu Timor Cup 2023, ho matéria Jogadór ne’ebé maiória mai husi Akademia AD SLB Laulara duni no kuaze joga ba selesaun nasionál Timor-Leste, AD SLB Laulara hatudu jogu bonitu dezde jogu hahú.
Prezidente Timor CUP 2023, Seza dos Santos hato’o agradese ba partisipasaun hosi klube oin-oin ne’ebé reprezenta nasaun idak-idak hodi hola parte iha eventu anuál jogu Timor CUP 2023 nian.
Entretantu, Kapitaun AD SLB Laulara, Efren Santos hato’o agradese ba ekipa Timor CUP ne’ebé fasilita kondisaun hotu hodi realiza jogu amizade entre klube oin-oin hosi nasaun sira hodi bele hametin sira nia unidade no buka aprende no fahe esperensia ba malu durante jogu hahú to’o remata.
“Agradese tebes bele reprezenta Timor-Leste mai iha jogu Timor CUP ne’e hodi aprende no fahe esperensia ba malu iha jogu, mezmu mosu situasaun balun, maibé ita hotu mantein dixiplina iha jogu mezmu ita hakarak manan, maibé ita manan ou lakon ida ne’e jogu mai hodi buka esperensia no ekipa AD SLB agradese ba adeptu hotu ne’ebé fó ona apoiu hosi Austrália no Timor-Leste,” nia hato’o agradese.
Lori ekipa nia naran, hato’o ba Prezidente AD SLB, Kay Rala Xanana Gusmão, Mana Kirsty Sword Gusmão hodi fasilita ona kondisaun hotu ho di’ak durante jogu.
“Ha’u orgullu tebe-tebes ba jogador sira hosi AD SLB Laulara hetan terseiru lugar iha jogu Timor CUP no agradese ba ekipa sira no Kay Olok hetan mós premiu nu’udar jogador ho golu barak liu no ha’u hein ekipa kontinua aprende esperensia di’ak hosi jogu ne’e hodi dezenvolve desportu iha Timor-Leste,” informa Kirsty Gusmão liu hosi akun Faceebok.
Entretantu iha parte seluk, Mana Kirsty Sword Gusmão hato’o agradese tebes ba ekipa Timor CUP inklui mós jogador tomak hosi AD SLB Laulara bele hetan terseiru lugar.
Fundadora Sala Leitura Xanana Reading Room no Fundasaun Alola ne’e akompaña mós Kay Olok Gusmão hamutuk ho kolega jogador tomak AD SLB ba simu taxa.
Durante jogu klube hamutuk 8 maka reprezenta nasaun idak-idak hodi hola parte iha jogu ne’e. Serimónia fahe taxa no medulla ba manan nain sira hala’o iha Kampu Futeból, Melbourne-Austrália partisipa direita hosi ema atus ne’ebé fó suporta sira nia klube idak-idak.
Tuir planu, segunda feira 15 ohin, ekipa Jogador AD SLB tomak sei fila hosi Austrália liu Bali too Timor-Leste ho aviaun Aero Dili iha oras 12:30.
Notísia relevante:Jogadór AD SLB Laulara na’in-19 desloka ba Austrália hodi partisipa jogu Timor CUP
Jornalista: Jesuína Xavier
Editór : Florencio Miranda Ximenes
