iklan

COVALIMA, HEADLINE

Autoridade Covalima planeia harii gazebo iha sítiu turístiku iha postu haat

Autoridade Covalima planeia harii gazebo iha sítiu turístiku iha postu haat

Diretór Servisu Jestaun Turizmu, Vitorino do Carmo. Imajen/Celestina Teles.

COVALIMA, 17 janeiru 2024 (TATOLI) – Administrasaun Munisípiu Covalima (AMC), liuhusi Servisu Jestaun Merkadu no Turizmu prioriza harii gazebo iha fatin turístiku sira iha postu administrativu haat.

Diretór Servisu Jestaun Turizmu, Vitorino do Carmo, hatete sitíu turístiku ne’ebé identifikadu atu halo gazebo mak iha aldeia Kulu-oan, suku Tashilin, postu administrativu Zumalai hamutuk 10 ho nia orsamentu $1.250. Iha suku Suai Loro, postu Suai sei harii mós 10 ho nia verba 1.250, iha Biku-laran iha postu Tilomar harii 10 ho orsamentu $1.250 no iha suku Dato-Tolu, postu Fohorem lima ho osan $500.

Administradór Postu Administrativu Suai, Luzinho do Rego, hatete nia parte seidauk simu informasaun husi Servisu Munisipál Jestaun Merkadu no Turizmu atu harii gazebo iha suku Suai Loro no seidauk haree iha aprezentasaun Planu Asaun Anuál.

Tuir dadus 2023, Servisu Jestaun Merkadu no Turizmu identifika sítiu turístiku komunitária, kulturál no relajiozu hamutuk 18 ne’ebé eziste iha postu administrativu Fatululik, Fatumean, Maucatar, Fohorem no Zumalai.

Lokál turístiku iha postu administrativu Fatululik iha haat mak foho Taroman no Motfor, Liurai Tolu nia fatin no edifísiu tuan postu administrativu.

Iha Maucatar iha sítiu turístiku rua mak foho Lakirin no Sadan Lulik, iha Fohorem haat mak Lagoa Lokon Kora, turizmu istóriku 12 de Setembro, Krús Motór no antigu edifísiu postu administrativu Fohorem.

Iha Zumalai eziste fatin haat hanesan We Tudak Bet, tasi ibun Kulu Oan, Sala Asa iha suku Lour no turizmu natureza Soran Japaun no iha Fatumean iha haat mak Gruta Santa Maria Imaculada, Fatuk Kuak Dore Malik, Bee Matan Naturál no turizmu komunitariu kria gazebo.

Notísia relevante: Autoridade Covalima identifika ona sítiu turístiku hamutuk 18

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!