DILI, 18 janeiru 2024 (TATOLI) – Embaxadór Japaun iha Timor-Leste, Tetsuya Kimura, hato’o agradesimentu ba Estadu Timor-Leste (TL) ne’ebé fó solidaridade ba povu Japaun balun ne’ebé afetadu ba rai-nakdoko foin lalais ne’e.
“Lori Governu Japaun hato’o agradesimentu ba Estadu no povu Timor-Leste ne’ebé fó ona solidaridade ba povu Japaun sira ne’ebé foin lalais afetadu ba rai-nakdoko”, Embaxadór ne’e ba jornalista sira hafoin hasoru malu ho Prezidente Repúblika, José Ramos Horta, iha Palásiu Prezidensiál, ohin.
Parlamentu Nasionál, ohin, liuhosi sesaun plenária aprova votu pezar no solidarizasaun ba vítima dezastre naturál rai-nakdoko iha Japaun.
Votasaun ba Deputadu sira iha Parlamentu Nasionál ho votu afavór 50 kontra zero no abstensaun zero.
Rai nakdoko iha Japaun ho magnitude 7,6 iha eskala ne’ebé to’o Peninsula Noto iha Ishikawa, Japaun, iha segunda (01/02).
Dezastre naturál ne’e estraga edifísiu no estrada no ema hamutuk 84 mak lakon vida, kanek 300-resin no ema atus ba atus mak lakon.
Aleinde ne’e, komunidade kontinua la iha bee no naroman, enkuantu ekipa salvasaun kontinua buka sobrevivente sira.
Komunidade Ishikawa, daudaun ne’e, hamutuk 62 mak mate no ekipa kontinua buka abitante seluk.
Iha fatin seluk iha Japaun mós deteta rai nakdoko hanesan Nigata, Toyama, Fukui Nagano Gifu Tokyo, Yamagata, Fukushima, Ibaraki, Tochigi, Gunma, Saitama Shizuoka, Alch Mie Shiga, kyoto Osaka Hyogo, Nara, Tottori, Iwate Miayagi no Akita.
Sorumutu entre Embaixadór Japaun ho Prezidente Timorense diskute mós asuntu importante tolu.
“Asuntu tolu, ami ko’alia mak Japaun apoiu másimu ba Timor-Leste nia adezaun ba ASEAN, ida mak sei hala’o projetu foun hanesan programa destakamentu ofisiál Governu Timor-Leste nian ba Sekretariadu ASEAN, JICA sei hala’o projetu foun no sei koordena ho Governu iha área saida de’it mak Governu presiza no formasaun lian japaun ba joven sira”, nia konklui.
Jornalista: Hortencio Sanchez
Editór : Zezito Silva
