ACT promove kafé iha Itália-Olanda-Singapura no Xina
DILI, 19 dezembru 2024 (TATOLI)–Asosiasaun Café Timor (ACT, sigla portugés) promove kafé ho nia membru sira promove kafé liuhosi meiu rede sosiál no amostra kafé iha rai-li’ur hanesan Milan-Itália, Olanda, Singapura no Xina.
Notísia Relevante: Xineza gosta kafé Timor-Leste tanba kualidade no la kontaminadu
“Mekanizmu halo mak ita liu hosi pájina Facebook asosiasaun nian. Prezidente ho nia membru asosiasaun lori ita-nia kafé rasik mak hanesan kafé-musan matak no sona ona no perfil kafé Timor hodi halo promosaun iha mundu,” Prezidente ACT, Evangelino Monteiro Soares, hateten ba Agência Tatoli iha “Entervista Esklusiva” iha estudiu Agência TATOLI, Faról.
Promosaun kafé iha rai-li’ur ne’e, membru ACT sira-nia membru hanesan PARCIC, Timor Globál mak reprezenta ACT ba halo promosaun iha merkadu mundiál no liuhosi promosaun kafé ne’e membru asosiasaun sira konsege esporta produtu kafé Timor ba rai-li’ur.
“Kuantidade ba promosaun depende ba empreza, ne’e ita lori de’it amostra ne’ebé ita bele lori kilo rua ka tolu to’o 10. Kada membru asosiasaun ne’ebé halo esportasaun mak sura hamutuk tonelada rihun 18 por anu ne’e,” nia dehan.
Buat ida únika mak Timor-Leste halo promosaun kafé hibrida iha mundu, entaun ema lakoñese Timor-Leste maibé ho promosaun ne’e ema bele hatene Timor.
“Tamba ne’e mak kafé hibrida atrai ema iha merkadu mundiál. Tuir istória, kafé hibrida mate hotu iha 1927 iha mundu, maibe ita nia kafé hibrida de Timor mak ba salva kafé iha mundu,” nia dehan.
Tuir nia, agora nasaun liu 50 mak kuda fali kafé híbrida de Timor hanesan ezemplu iha Brazil sira bolu kafe hibridu ho naran Catimor no iha México hanaran Chatimor.
Ezisténsia kafé hibrida iha Timor-Leste ajuda fasilmente promosaun produtu kafé iha merkadu internasionál, tanba nasaun barak bele kuda fali kafé hibrida Timor nian.
Jornalista : Jesuína Xavier
Editor : Cancio Ximenes
