OÉ-CUSSE, 22 janeiru 2024 (TATOLI) – Durante tinan 2023, operasaun aviaun Zona Espesiál Ekonómia Sosiál Merkadu Timor-Leste (ZEESM-TL), rekolla reseita ba kofre Estadu hamutuk $$539,437.00.
Notísia relevante: Autoridade RAEOA dezloka funsionáriu aeroportu 25 tuir formasaun iha Jakarta
Reseita $539,437.00 rekolla hahú hosi fulan-janeiru to’o dezembru 2023, liuhosi billete aviaun nian, ba operasaun Díli Oé-Cusse, la inklui Dili ba munisípiu seluk.
Nune’e Prezidente Autoridade sesante RAEOA, Arsénio Paixão Bano, rekomenda ba Governu Sentrál presiza tau matan ba funsionáriu sira-nia direitu, tanba konstratu remata ona iha loron 31 dezembru 2023 ne’e.
“Iha aeroportu Rota do sandâlo, ha’u ba husu ita-nia staf sira iha-ne’ebá, tanba sira kontratu hotu, para aguenta, sei sira para iha aeroportu, aviaun ne’e sé mak atu haree, jestaun aeroportu sé mak atu haree, ita investe iha aeroportu ne’e, besik rihun $100, sei ita-nia komtratadu sira para, aeroportu ne’e bele abandona. Ha’u husu Governu Sentrál atu haree lalais asuntu ne’e, tanba ne’e kleur demais ona,” Arsénio Paixão Bano, ko’alia iha Oé-Cusse, segunda ne’e.
Notísia relevante: RAEOA-EUA selebra akordu ho valór rihun $933 haforsa konetividade voo iha Oe-Cusse
Arsénio Paixão Bano, hateten, antes ne’e balu dezloka ba Indonézia, tuir formasaun hodi hasa’e koñesimentu ba área bombeiru, seguransa no tékniku oinoin.
“Sé ita la kontinua sira-nia kontratu, Estadu lakon ona osan lubun, tanba ita investe ona iha rekursu umanu, entaun sira presiza tau atensaun,” nia informa.
Entretantu, kona-bá presu billete, durante ne’e laiha mudansa, ho presu tolu, billete ba labarik $20,00, billete komún $40,00 no sira-ne’ebé ordén servisu $50,00.
Notísia relevante: Governu planeia transforma aviaun ZEESM sai transporte aérea nasionál
Jornalista: Abílio Elo Nini
Editór: Evaristo Soares Martins
