Sekretáriu Estadu Domingos Lopes enkoraja estudante estuda sai jerasaun kualidade
DILI, 23 janeiru 2024 (TATOLI)—Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos Lopes, tersa ne’e, halo abertura ba anu letivu tinan 2024 nian ne’ebé ho tema “Liuhosi Edukasaun Muda Mentalidade” iha Eskola Semináriu Nossa Senhora de Fátima Balide.
“Futuru nasaun mak imi estudante sira, nune’e kontinua enkoraja atu estuda makaas, presiza respeita malu no hadomi malu. Imi presiza estuda no aprende liuhosi formasaun ne’ebé profesór, padre, frater sira fó tanba imi mak sai jerasaun foun ne’ebé tenke iha kualidae,” Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál hateten iha ámbitu abertura anu letivu tinan 2024 nian, ba semináriu Nossa Senhora de Fátima Balide.
Governante ne’e enkoraja no husu ba estudante sira aproveita oportunidade hodi aprende formasaun hodi muda mentalidade estudante nian, bainhira fila ba komunidade ho mentalidade organizadu no orientadu.
Diretór Eskola Semináriu Nossa Senhora de Fátima Balide, Pe. Natalino da Costa Soares, hateten estudante iha eskola ne’e presiza iha importante haat nune’e bele muda sira-nia mentalidade.
“Iha buat haat importante hanesan iha kompeténsia, kompaisaun, konsiénsia no kompromisu. Katak forma sira iha kompeténsia pelumenus iha kakutak, kakutak ida-ne’ebé iha kompaisaun no fuan. Depois fuan ne’e lori sira ba konsiénsia ne’ebé deside hili di’ak ka aat, nune’e to’o tempu ida sira tenke hili kompromisu ida iha sira-nia moris. Saida mak ha’u bele halo iha ha’u-nia moris no ba nasaun ida-ne’e, nune’e bele kontribui importante haat ne’e,” nia hateten.
Tanba ne’e, nia dehan, atu muda mentalidade presiza liuhosi edukasaun hodi bele transforma ema sai ema-ne’ebé di’ak no kualidade ba futuru nasaun nian.
“Ami konvida Exelénsia Sekretáriu Estadu halo abertura ba anu letivu tinan 2024 nian ne’ebé ho tema ‘liuhosi edukasaun muda mentalidade’, ho esperansa katak prezensa Exelénsia nian katak ohin fó esperansa, motivasaun, enkoraja estudante sira atu mais ativa liután iha estudu, partisipa mais liután iha aprendizajen. Liuhosi ne’e forma sira sai jerasaun foun ne’ebé kualidade,” nia hateten.
Iha Eskola Semináriu Nossa Senhora de Fátima Balide ne’e, iha estudante foun hamutuk ema na’in-105 no ho estudante tuan hamutuk na’in-205, ho profesór hamutuk na’in-25 inklui ho profesór na’in-10 ne’ebé Governu kontrata.
Jornalista : Osória Marques
Editór : Cancio Ximenes
