FDA-TL sei halo selesaun atleta universitáriu bá partisipa ASEAN University Games
DILI, 25 janeiru 2024 (TATOLI) – Prezidente Desportu Akadémika-Timor-Leste (FDA-TL), Zeferino Tilman, informa, daudaun halo hela preparasaun atu Timor-Leste bele bá kompete iha ASEAN University Games ne’ebé realiza jullu tinan ne’e, iha Surabaya Indonézia.
“Ami halo hela preparasaun atu ita bele bá kompete iha ASEAN University Games iha Indonézia, ne’ebé hahú 26 juñu to’o 06 jullu,” informa Prezidente ne’e ba Agência TATOLI, I.P iha edifisiu Universidade Nasionál Timor-Lorosa’e (UNTL) Dili, kinta ne’e.
Iha tempu badak, FDA-TL halo selesaun ba jogadór sira kada Universidade iha territóriu nasionál, nune’e bele buka atleta ne’ebé kualifikadu hodi ba kompete iha eventu ne’e.
FDA-TL mós hasoru malu ona ho Diretór Nasionál Desportu iha Ministériu Juventude Desportu Arte no Kultura (MJDAK), atu ko’alia hodi fó apoiu fundu atu halo selesaun ba atleta no fasilita atleta sira ba tuir kompetisaun ne’e.
“Ami sei halo proposta iha tempu besik hodi submete ba sira, nune’e sira bele fó apoiu ami halo preparasaun ba atividade ne’e, tanba ita nia atleta estudante sira bá reprezenta Timor-Leste,” nia haklaken.
Daudaun ne’e, Federasaun rejista ona modalidade lima hanesan Atletizmu, Taekwondo, Xadres, Voleiból no futeból salaun ka futsál.
Nune’e , iha loron 29 janeiru agora ekipa delegasaun Timor-Leste sei aranka ba Surabaya Indonézia hodi partisipa reuniaun entre ekipa delegasaun hosi nasaun seluk.
ASEAN university realiza kada tinan rua dala ida hosi nasaun membru ASEAN hotu, nasaun ne’ebé iha direitu absoluta partisipa iha eventu ne’e mak hanesan, Timor-Leste, Kamboja, Laos, Filipina, Indonézia, Malázia, Singapura, Brunei Darusalam, Thailandia, Myanmar no Vietname.
Jornalista: Hortencio Sanchez
Editór : Florencio Miranda Ximenes
