iklan

EKONOMIA, HEADLINE, MUNISÍPIU, OÉ-CUSSE (RAEOA)

Konstrusaun postu integradu Oésilo atinje 80%

Konstrusaun postu integradu Oésilo atinje 80%

Diretor Obra Publika, Candido dos Reis Amaral. Imajen Tatoli/Abílio Elo Nini.

OÉ-CUSSE, 26 janeiru 2024 (TATOLI) – Konstrusaun Postu Integradu iha fronteira sub- Oésilo, Rejiaun Administrativa Espesiál Oé-Cusse Ambeno, ne’ebé lokaliza iha suku Bobometo, daudaun ne’e atinje ona 80%.

“Postu integradu Oésilo nia progresu ne’e iha ona 80%, tanba agora sira fokuliu ba uma de’it ona,” Diretór Obra Públika Oé-Cusse Candido dos Reis Amarál, ba jornalista sira iha Oé-Cusse, segunda ne’e.

Notísia relevante: RAEOA aloka rihun $510-resin harii postu integradu Oésilo

Tuir nia, konstrusaun ne’e hahú uluk ho eskavasaun tanba fatin ne’ebé atu harii konstrusaun ne’e iha foho no presiza halo tetuk.

“Ita hatene sira tenke avansa uluk halo eskavasaun tenke muda foho oan ne’e, nune’e iha espasu natoon atu harii edifiísu provizória ba sira atu uza, la’ós edifísiu fatin ba ofisiál fronteira sira hela ba, depois mak ita hanoin, karik autoridade foun ne’e atu haree, tanba ne’ebá ne’e nesesáriu tebes, ita labele hela de’it iha edifísiu de’it, liuliu ba autoridade anteriór, iha ona planu maibé osan ne’ebé maka ita investe ba konstrusaun ne’e natoon de’it atu halo eskavasaun no harii hela fatin ba ofisiál fronteira sira,” nia informa.

Nia hateten, projetu postu integradu Oesilo importante ba Timor-Leste atu hametin relasaun di’ak liután ho nasaun viziñu Indonézia hodi hasa’e kresimentu ekonómiku rai rua nian tanba Oé-Cusse Ambeno, liga direita ba distritu TTU-Kefamenanu.

“Durante ne’e, odamatan ida de’it liuhosi Sakatu Wini, entaun ba futuru bainhira postu ne’e finaliza bele utiliza ona,” nia katak.

Notísia relevante:RAEOA lansa postu integradu Oésilo hodi hasa’e kresimentu ekonomia fronteira

Entretantu, projetu postu integradu Oésilo, Autoridade RAEOA halo lansamentu iha loron 16 outubru 2023, ne’ebé ezekuta hosi kompañia Lifau Indah Unipesoál Lda, ho valór kontratu $510,516.73.

Orsamentu ne’e Autoridade RAEOA prevee  hosi Orsamentu Jerál Estadu (OJE) 2023 nian ho durasaun kontratu tinan ida. Obra ne’ebé kompañia konstrui maka hanesan postu integradu fronteira Oésilo kompleta ho rezidénsia ba pesoál Alfándega.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!