DILI, 26 janeiru 2024 (TATOLI) – Diretór Nasional Desportu Federadu Ministériu Juventude Desportu Arte no Kultura (MJDAK), Oscar Dias Quintas, hateten , tinan ida ne’e, Governu prevee orsamentu $1.554.917 hodi apoia atividade desportiva iha rai laran no rai li’ur.
“Tinan ida ne’e, Governu aloka orsamentu ba federasaun sira iha Timor-Leste hodi apoia sira nia kompetisaun hamutuk $1,554.917, orsamentu ne’e apoia mós ba iha eventu internasionál sira hanesan jogu Olimpiku ne’ebé sei hala’o iha Paris fulan jullu mai ne’e,” hateten Diretór ne’e ba Agência TATOLI,I.P, iha edifisiu MJDAK,Leci-dere, sesta ne’e.
Federasaun ne’ebé sei iha diretu absoluta ba osan ne’ebé Governu aloka mak hanesan, Atletizmu, Federasaun Futeból Timor-Leste (FFTL) hodi suporta ba Liga Futeból Timor-Leste, Taekwondo, Karate-do, Boxe, Federasaun Voleiból Timor-Leste (FVTL) hodi realiza liga Voleiból Timor-Leste no Federasaun Basketból Timor-Leste (FBTL) hodi realiza liga Basketból Timor-Leste.
Hosi orsamentu ne’e, FFTL sei simu $200.000, Liga Voleiból sei simu $70.000, fundu ba dezenvolvimentu atleta 450.000, Atletizmu sei simu 22.000, Karate-do sei simu $12.000, Taekwondo sei simu $15.000, Boxe sei simu $20.000, Basketbol sei simu $18.572.
Enkuantu restu hosi orsamentu ne’e sei aloka ba kompetisaun internasionál sira hanesan jogu Olimpiku Paris, ASEAN University Games no seluk tan.
Jornalista: Hortencio Sanchez
Editór : Florencio Miranda Ximenes
