LAUTEM, 27 janeiru 2024 (TATOLI) – Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hala’o sosializasaun no diálogu hodi introdus programa dezenvolvimentu rurál ba komunidade iha Postu Administrativu Luro, Munisipiu Lautem.
Vise Primeiru Ministru Assanami hateten objetivu prinsipál husi sosializasaun no diálogu ne’e mak oinsá movimenta hamutuk ho povu, servisu maka’as ho volontáriu no badinas ba povu nia moris diak.
“Povu tenke moris ho integridade. Tanba ne’e mak ita tenke hasa’e povu nia kbiit liuhosi hakbesik programa ba sira. No ita mos tenke hasa’e povu nia koñesimentu atu sira bele hatene sira nia potensialidade,” Assanami ba jornalista sira iha Postu Administrativu Luro, sesta ne,e, (26/01).
Vise Primeiru Ministru realsa katak Governu liuhosi Ministériu Dezenvolvimentu Rurál no Abitasaun Komunitária (MDRAK) tun ba baze hodi rona povu Luro nia preokupasuan hodi defini dezenvolvimentu nasional. Atu nune’e hodi bele halo planu no ajustamentu ne,ebé diak ba dezenvolvimentu integradu rural.
“Tenke transforma povu ida ne,e tuir prinsipiu ukun rasik aan, atu povu ne’e sai povu republikanu, povu demokrátiku, povu sivilizadu, povu saudável, no povu ida ne’ebé moris iha dame no paz,’’ tenik Assanami.
Nia salienta katak povu tenke iha integridade no iha koñesimentu hodi dezenvolve anrasik: “Tanba ne’e mak iha sosializasun ida ne,e MDRAK lori mos Ministériu sira hanesan Ministériu Obras Públikas, Ministériu Agrikultura, Pekuária, no Floresta, Ministériu Komersiu, inklui seitor privadu hodi mai hare direita no rona preokupasaun povu nian hodi halo planu prioridade ba dezenvolvimentu rural.”
“Sosializasaun no diálogu ida ne,e foin hahu dahuluk tanba ne,e hau sei komunika beibeik ho Ministériu tutela sira atu mai vizita bebeik Luro hodi hamutuk ho povu halo planu no ezekuta hamutuk. Hanesan, oinsa mak hakiak animal, kuda ai-oan ho valor econômiku hanesan ai-kemeli, ai-teka no seluk,’’ nia hatutan.
Iha biban ne,e Prezidente Autoridade Munisipiu Lautem, Domingos Savio husu ba povu Luro atu kria unidade no paz, halakon odio no vingansa, labele mete arte marsial no arte ritual hodi simu programa dezenvolvimentu rural.
“Joven tenke kria unidade atu moris iha dame no hakmatek. Hau husu ba komunidade hotu iha Luro atu simu ita nia governu hodi implementa program oioin bazeia ba ita nia prioridade” nia tenik.
Administrador Postu Administrativu Luro, Augusto Felixiano Ramos Branco agradese ba Governu Liuhosi MDRAK tanba hili Postu Administrativu Luro hodi lansa programa dezenvolvimentu rural: “Hau fiar katak programa sira ne,e sei implementa bazeia ba povu nia prokupasaun.”
“Postu Adminstrativu Luro kompostu hosi suku neen mak hanesann Afabubu, Lakawa, Barikafa, Kotumutu, Odofuro no Luro Vila ho nia abitante hamutuk 9,000 resin ne’ebé mak pronto simu programa dezenvolvimentu rural,” Branco realsa.
“Hau sei orienta hau nia xefi suku sira hodi serivisu hamutuk, kria unidade no paz hodi simu programa dezenvolvimentu oi-oin ne,ebé iha tempu badak sei implementa iha postu adminstrativu ida ne’e hodi fo moris diak ba povu,” nia hateten.
Entertantu, iha sosializasaun no diálogu ne’e, xefi suku sira ezizi governu hodi hadia sistema irigasaun, bee mos, estrada, asesu eletrisidade, infraestrutura, edukasaun, no asuntu sosial seluk.
Ho nune’e Vise Primeiru Ministru Assanami responde katak iha tempu badak nia sei kordena ho Minstériu relevante sira hodi vizita no halo planu asaun nasional hamutuk ho komunidade hodi responde ba prekupasaun komunidade nian.
Sosializasaun no Diálogu Komunitariu refere hetan partisipasun maximu husi komunidade Postu Adminstrativu Luro no tuir planu sei halo faze daruak iha Munisipiu Manatuto, semana oin.
Jornalista: Camilio de Sousa
Editor : Filomeno Martins
