iklan

EKONOMIA, BOBONARO, HEADLINE, MUNISÍPIU

Empreza Romante hahú normaliza estrada Balibo-Maliana

Empreza Romante hahú normaliza estrada Balibo-Maliana

Traballadór hosi Empreza Romante Unipesoal Lda halo hela normalizasaun ba estrada iha área Leolima ligasaun hosi postu administrativu Balibo ba postu administrativu Maliana ne'ebé ameasadu atu kotu. Imajen Tatoli/Sérgio da Cruz.

BALIBO, 29 janeiru 2024 (TATOLI)-Ministériu Obra Públika  orienta empreza Romante Unipesoál Lda, domingu ne’e hahú halo normalizasaun ba estrada nasionál lokaliza iha suku Leolima ligasaun hosi postu administrativu Balibo ba postu administrativu Maliana, munisípiu Bobonaro ne’ebé ameasadu atu kotu hafoin akontese udan-boot foin lalais ne’e.

Sepervizór Tékniku hosi Diresaun Servisu Munisipál Obra Públika, Munisípiu Bobonaro, Fernando de Fátima, hateten projetu manutensaun refere ho karáter emerjensia, atu fasilita movimentu transporte públiku no privada hosi diresaun Maliana ba Dili.

Notisia relevante: Deputadu sira ‘triste’ haree direta kondisaun estrada Balibo-Maliana

“Ne’e atu atende lalais ho emerjénsia hodi nune’e movimentu bele la’o, tanba estrada ne’e atu kotu, hela de’it oituan ona, maibé agora daudaun Obras Públika halo hela planu ida atu tau konstrusaun permanente ida iha-ne’e,” nia informa ba jornalista sira iha Maliana, segunda ne’e.

Traballadór hosi Empreza Romante Unipesoal Lda halo hela normalizasaun ba estrada iha área Leolima ligasaun hosi postu administrativu Balibo ba postu administrativu Maliana ne’ebé ameasadu atu kotu. Imajen Tatoli/Sérgio da Cruz.

Estrada refere hetan ameasadu atu kotu hahú kedas iha tinan kotuk no foin lalais ne’e mak akontese grave liu tanba estrutura rai la metin.

Nune’e ekipa Obra Públika identifika estrada Balibo iha fatin haat mak hetan ameasadu atu kotu no sei halo manutensaun emerjénsia hotu iha tempu badak.

“Atu fó hatene de’it ba públiku katak, ita hotu hatene kondisaun rai Balibo ne’e halo nusa, rai ne’e nia kondisaun mak hanesan ne’e duni. Ne’e duni husu ita hotu atu kompriende no pasiénsia tanba agaora ita atende ona emerjensia, la kleur tan ita la’o ho di’ak,” nia katak.

Administradór postu administrativu Balibo, Amilcar Tavares, agradese ba Governu tanba bele foti medida no intervensaun sedu molok estrada refere kotu totál.

Nia husu ba governu atu tau prioridade mos atu halo mos manutensaun ba estrada sira seluk, liuliu iha área Batugade ne’ebé hetan estragu.

“Ita haree ba nível risku ne’e barak loos, estrada ne’e estraga tanba saluran laiha, se bele governu fó tan kompañia ne’e kontinua tán, nune’e tempu udan ne’e bele salva lalais risku sira ne’e,” nia rekomenda.

Tuir observasaun Jornalista Agência Tatoli iha terrenu nota katak, daudaun ne’e movimentasaun transporte públiku hosi diresaun Maliana ba Dili sei normál hela.

Notísia relevante: Amilcar husu MOP hadi’ak estrada Batugade-Balibo

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!