LAUTEM, 29 janeiru 2024 (TATOLI) – Komunidade Postu Administrativu Luro, Munisipiu Lautem preokupa tanba la hetan asesu ba foos subsídiu ne’ebé mak subsídia husi governo hodi fa’an ho folin US$11.
Preokupasaun hirak ne,e hato’o husi reprezentante komunidade Luro, Celia Barreto Gomes bainhira partisipa iha diálogue no sensibilizasaun programa dezenvolvimentu rural hala’o husi Ministériu Dezenvolvimentu Rural no Abitasaun Komunitariu (MDRAK), iha Postu Admintrativu Luro, sesta seman kotuk (26/01).
“Ami rona Governu sentral subsídia kompania sira hodi fa’an foos ho folin baratu maibe to agora ami la asesu ba foos refere. Tanba ne’e ami husu ba Ministériu Komérsiu no Indústria (MKI) se bele fasilita ami atu hetan asesu ba foos refere iha ami nia suku,’’ Celia hateten.
Nia subliña komunidade iha Postu Administrativu Luro persija tebes foos baratu tanba foos seluk ne’ebé mak fa’an iha loja sira folin aumenta sa’e no susar ba familia kbi’it laek atu sosa.
“Foos ne’ebé fa’an iha Luro, kilograma 25 nia folin US$20. Entaun susar tebes ba ami atu sosa,’’ Celia haktuir.
Iha fatin hanesan, hatan ba preokupasaun ne’e, Vise Ministru Komérsiu no Indústria, Augusto Júnior Trindade hateten katak governu temporariamente suspende hela aktividade fa’an foos subsídiu tanba iha kompania balun ne’ebé mak halimar ho folin foos refere.
“Ita suspende temporariamente aktiviadade fa’an foos subsídia husi governu tanba iha kompania balun ne’ebé mak fa’an foos refere la tuir folin ne’ebé mak deside ona. Hanesan foos kilograma 25 ne’ebé mak ita deside hodi fa’an ho folin US$9, kompania balun fa’an fali ho folin US$11 iha Dili no kompania balun fa’an iha munisipiu ho folin US$14 to US$15. Entaun, Governu liuhosi MKI deside hodi suspende lai aktividade refere hodi halo identifikasuan ba problema ne’e. No avaliasuan hotu mak ita bele komesa fa’an fali foos refere,” nia sublinha.
Vise Ministru Trindade husu ba komunidade iha munisipiu hotu atu pasiensia hein prosesu avaliasaun hotu mak governu bele komesa hikas fa’an foos subsídiu.
“Husu ba populasaun sira hotu, inklui populasaun Luro no Lautem mantein kalma hodi hein foos subsídiu tanba tempu badak foos hirak ne,e sei fa’an to imi nia aldeia,” nia konklui.
Jornalista: Camilio de Sousa
Editor : Filomeno Martins
