DILI, 29 janeiru 2024 (TATOLI)–Ministru Defeza no Ministru Dezenvolvimentu Internasionál no Pasífiku Austrália, Pat Conroy MP, segunda ne’e, hala’o vizita mai Timor-Leste no hasoru malu ho Primeiru-Ministru (PM), Kay Rala Xanana Gusmão.
“Vizita mai Timor-Leste hodi hametin liután ami-nia parseria ba tempu naruk ho Timor-Leste, ne’ebé sai hanesan ami-nia viziñu ne’ebé besik liu. Timor-Leste no Austrália iha parseria forte no amizade besik liu, ne’ebé sustenta hosi ligasaun istórika no kulturál ne’ebé kle’an,” Ministru Pat Conroy, relata hafoin ramata sorumutuk ho Xefe Governu, iha Gabinete Fronteira Marrítima no Terrestre, iha Palásiu Governu.
Nia dehan, país rua hakarak reforsa kompromisu ba dezenvolvimentu ekonómiku no rekursu umanu Timor- Leste, seguransa, preparasaun ba dezastre no prioridade mobilidade traballadór.
Durante vizita, Ministru Conroy anúnsia tan fundu hodi apoia servisu Polísia kualifikadu no profisionál iha Timor-Leste liuhosi Programa Dezenvolvimentu Polísia Timor-Leste (TLPDP). Kompromisu millaun AU$35 ne’e sei estende parseria polísia ne’ebé susesu entre Polísia Federál Austrália no Polísia Nasionál Timor-Leste (PNTL) ba tinan-lima tán.
Aleinde ne’e, Ministru Conroy mós fó sai programa foun ida hodi fó apoiu ba traballadór timor-oan sira ne’ebé partisipa iha Eskema Mobilidade Traballu Pasífiku Austrália (PALM). Servisu parseria hamutuk ho Governu Timor-Leste, kompromisu millaun AU$4 ida-ne’e sei fornese apoiu sosiál no reintegrasaun adisionál hodi masimiza benefísiu ne’ebé sei kontinua ba partisipasaun traballadór timor-oan sira nian iha eskema ne’e rasik.
Notísia relevante : Empreza australiana introdús polítika rekrutamentu timor-oan 10.000 bá serbisu
PALM fornese empregu, oportunidade no rendimentu ba Timor-Leste nia traballadór sira. Maizumenus traballadór timor-oan hamutuk 4.500 mak oras ne’e serbisu hela iha Austrália liuhosi eskema PALM nian, ho remisaun sira daudaun ne’e sai hanesan kontribuisaun segundu boot liu ba Timor-Leste nia Produtu Doméstiku Bruto nian hafoin petrolíferu.
Ministru Conroy mós anúnsia ona millaun AU$1,58 hodi ajuda Timor-Leste prepara no responde ba impaktu sedu hosi El Niño, ne’ebé hanesan parte ida hosi pakote apoiu millaun AU$5 ne’ebé fornese ba Timor-Leste no Pasífiku.
“Austrália nafatin sai nu’udar Timor-Leste nia parseiru dezenvolvimentu no seguransa boot liu no sei kontribui ba estimativa millaun $118 iha asisténsia dezenvolvimentu iha tinan 2023-2024,” nia kompromete.
Iha biban hanesan, Primeiru-Ministru, Kay Rala Xanana Gusmão, hateten, parte rua diskute oitoan kona-ba kooperasaun ne’ebé durante ne’e rai-rua hala’o.
“Hau hato’o obrigadu ba ministru, ba visita dahuluk. Ami diskute oitoan kona-ba kooperasaun, nomós área barak seluk no Austrália ajuda ita iha área balun ne’ebé mak ita persiza tebes. Ita persiza tebes atu dezenvolve nasaun ne’e no hametin liután ita-nia forsa Estadu iha área sira hanesan sosial, edukasaun, saúde, kriasaun kampu traballu, no seguransa,” Xanana reforsa.
Parte rua ko’alia mós kona-ba ekonomia azul, ne’ebé Ataúro atu sai hanesan sentru ba biodiversidade.
“Austrália prontu atu ko’alia ho ita hodi kontinua esplora liután iha área ne’ebé mak ita persiza. Prinsípiu Governu Austrália nian mak sira ajuda ita bazeia ba ita-nia persiza, no ida-ne’e importante tebes hodi hametin ita-nia relasaun bilaterál no amizade,” Xefe Governu tenik.
Jornalista : Antónia Gusmão
Editora : Julia Chatarina
