DILI, 05 janeiru 2024 (TATOLI)—Diretór Servisu Edukasaun Munisípiu Dili, Carlito da Silva, hateten ba eskola públiku sira-ne’ebé Eskol ensinu Báziku no Sekundáriu hamutuk iha resintu ida-de’it ne’e, depende ba direjente eskola sira-nia jestaun ba kontrolu estudante no fasilidade eskola nian.
“Kona-ba resintu Eskola Bázika Sentrál (EBC) 10 dezembru ho Sekundáriu Jerál 10 dezembru ne’e, ba ha’u, eskola rua ne’e hamutuk iha resintu ida de’it. Se ita halo agrupamentu ba bázika, pré-eskolar ho ensinu sekundáriu hamutuk ne’e di’ak liután. Depende ba nia jestór halo jestaun ho di’ak hodi oinsá ekilibriu ba situasaun ne’e. Importante mak estudante númeru ho sala-de-aula sufisiente,” Diretór Servisu Edukasaun ne’e hateten ba Agência Tatoli, iha nia kna’ar fatin. Segunda ne’e.
Kestaun eskola rua ne’e, nia hateten, Ministru Edukasaun sesante, João Cancio nia tempu deside atu taka tanba eskola rua hamutuk defisil atu kontrola.
“Maibé uluk ha’u hakarak separa duni EBC 10 dezembru ho ensinu sekundáriu jerál 10 dezembru ne’e, maibé momentu Ministru Edukasaun, sesante João Cancio nian tempu deside atu taka, ha’u la konkord, Tanba, parte Comoro ne’e ensinu sekundáriu públiku ne’e hela ida de’it ona mak Eskola Finantiln entaun labele akumula volume estudante ne’ebé boot ba eskola ida,” nia esplika.
Nia dehan, depende ba polítika edukasaun nian oinsá akumula estudante no jere nune’e labele mosu problema. Tanba tuir nia haree katak estudante iha Eskola 30 de Agosto ne’e númeru boot, depois eskola 10 de dezembro ho nia Filial tolu mak Aimutin, Bebonuk no Hudi Laran.
Aleinde ne’e, Diretor Interinu Eskola Báziku Sentrál (EBC-sigla protugés), Nicolau Amaral, rekomenda ba Ministéiru Edukasaun (ME) atu fahe resintu ne’e ba rua, nune’e EBC 10 de Dezembru no Ensinu Sekundáriu 10 de Dezembru no ida-idak bele kontrola ninian.
“Ami rekomenda ministériu atu di’ak liu halo separasaun hodi ida-idak hadi’a nia fatin. Tanba orsida ida mai hadi’a tiha, ida seluk mai sobu fali, entaun ho ida-ne’e ita dun malu. Espasu luan hela, karik Edukasaun munisipál ho nasionál bele separa ne’e di’ak liu tanba fasil kontrola,” nia dehan. Ba Agência Tatoli iha nia knar fatin EBC Comoro, sesta ne’e.
Nia dehan, resintu ne’e fahe ba EBC 10 Dezembru ba parte dadeer to’o meudia depois Eskola Sekundáriu Jerál 10 dezembru meudia to’o lorokraik.
“Mesmu eskola rua maibé ami jere, nune’e ida-idak la’o tuir nia oras, entaun EBC hahú 08h00-21h00 no Eskola Sekundáriu 13h00-5h30. Maibé iha kestaun balun ne’ebé tuur hamutuk hodi resolve,” nia hateten.
Tuir nia, eskola rua utiliza resintu ida maibé parte rua sempre koopera malu hodi haree ba labarik sira-nia futuru.
Eskola pre-eskolár públiku iha 20 inklui ho Ataúro nian, eskola bázika hamutuk 55 inklui ho nia Filial maibé ho Ataúro entaun besik 67, Eskola pre-sekudáriu iha 12 hamutuk ho Ataúro iha 15, agora ba eskola sekundáriu hamutuk ho Ataúro iha walu (8) no ho eskola paralelu Fatumeta ne’e agora to’o ona terseira klase ne’e hamutuk sia (9) no Ensinu Tékniku Vokasionál iha neen (6).
Jornalista : Osória Marques
Editór : Cancio Ximenes
