DILI, 06 fevereiru 2024 (TATOLI) – Embaixadora Cuba iha Timor-Leste , Grisel Alina Aldama Innis, hateten kontinua apoiu Timor-Leste iha área importante rua hanesan saúde no edukasaun hodi reforsa dezenvolvimentu nasaun.
“Cuba hanesan nasaun amigu, ba oin hakarak kontinua nafatin apoiu Timor-Leste iha área saúde no edukasaun nian iha 2024,” dehan Embaixadora Cuba ba jornalista sira iha Palásiu Governu hafoin hasoru malu ho Vise-Primeiru Ministru, Mariano Assanami Sabino, tersa ne’e.
Nia dehan, akordu entre nasaun rua selebra ona iha tinan hira ba kotuk iha área saúde no edukasaun.
Durante enkontru parte rua ko’alia kona-ba kolaboradór médiku no kolaboradór desportiva ne’ebé durante ne’e fó asisténsia ba Timor-Leste, liuhusi Universidade Nasionál Timor Lorosa’e (UNTL).
Enkunatu, kolaboradór Cuba sira mós hala’o hela servisu saúde komunitária iha munisipiu hotu-hotu, hanesan mediku sira akompaña estudante sira iha área siensia nian.
Setór saúde
Tuir dadus rekursu umanu hosi Ministériu Saúde katak espesialista timoroan hamutuk 74 ne’ebé halo atendimentu iha Hospitál Nasionál Guido Valadares no Hopsitál referál sira iha Munisípiu.
Mediku espesialista 74 kompostu hosi área espesialista anestesia nain haat, dentista na’in-rua, dermatolojista nain-tolu, endrokolojia na’in-rua, espesialista ba tilun, kakorok no ibun na’in-rua.
Enkuantu, espesialista ba jenekolojia tolu, internista lima, intensiva emerjénsia lima, kardiolojia na’in-hitu, nefrolojia na’in-neen, objym neen. Oftamolojista lima, onkolojia rua, ortopedista rua, patolojia anatomi ida, patolojia klínika ida, pediatria haat, psikataria rua, polmonolojista rua, radiolojista rua no sirurjiaun neen.
Tuir dadus, Timoroan hamutuk 1.018 mak hetan bolsa estudu ba Cuba iha área medisina jerál, médiku jerál no médiku espesialista.
Setór edukasaun
Iha setór edukasaun Cuba foku liu apoiu Departamentu Edukasaun Fíziku no Desportu iha UNTL, atu bele prodús rekursu umanu ka profesór, hodi hanorin fali eskola iha territóriu nasionál.
Iha kooperasaun entre Timor-Leste ho Cuba hakarak produs rekursu umanu ka profesór sira atu hanorin matéria edukasaun fíziku, desportu no saúde ijiene ba alunu sira iha territóriu nasionál.
Jornalista: Hortencio Sanchez
Editór : Florencio Miranda Ximenes
