iklan

INTERNASIONÁL, DILI, HEADLINE

WFP apoia fasilidade ba INETL hodi rekolla dadus vulneravél

WFP apoia fasilidade ba INETL hodi rekolla dadus vulneravél

Bandera Timor-Leste ho Timor WFP. Imajen Tatoli/Francisco Sony

DILI, 06 fevereiru 2024 (TATOLI) –  World Food Programme (WFP) hanesan parseiru dezenvolvimentu ba Estadu Timor-Leste, tersa ne’e, apoiu fasilidade hanesan laptop rua ba Institutu Nasionál Estatistika Timor-Leste (INETL) hodi fasilita ba analiza dadus kona-ba vulneravél l iha Timor-Leste.

“WFP apoiu laptop rua mai ami atu fasilita no analiza dadus kona-bavulneravél , tanba Ministériu Solidaridade Sosiál husu ami atu aprova dadus kona-ba vurneravel iha área remota, entaun ho ekipamentu ne’ebé apoiu hosi WFP bele fasilita liutan servisu, atubele fornese dadus ba Ministériu Solidaridade,” hatete Prezidente INETL, Elias dos Santos Fereira, ba jornalista sira iha Caicoli Dili, tersa ne’e.

MSSI atu fó apoiu orsamentu ba ema vulneravél sira, maibé presiza dadus ne’ebé klaru atu nune’e labele iha fallansu, nune’e INETL servisu hamutuk ho WFP hodi analiza dadus ne’ebé klaru haruka ba MSSI.

Molok ne’e, WFP apoiu ona mobile smartphones hamutuk 38 atu halo kolesaun dadus ba CPI no IPK no iha sensus uma-kain iha tinan 2022 . Alende ne’e WFP mós fó apoia mobile android hamutuk 100.

“Ho apoiu sira ne’e hotu mak ajuda ami hodi finaliza dadus no relatoriu sensus fó fila-fali , nune’e daudaun iha prosesu printing,” nia afirma.

Iha fatin hanesan, Reprezentante WFP iha Timor-Leste, Cecilia Garzon, hateten apoiu ne’e  importante tanba iha Timor-Leste instituisaun ne’e mak esensiál tanba nia mak fornese dadus ba Governu hodi bele hala’o servisu.

“INETL esensiál tebes iha nasaun ida ne’e, sira nia servisu ne’e importante tanba sira mak fornese dadus ba Governu hanesan preparasaun orsamentu no ba atividade saida de’it, entaun WFP nia apoiu ne’e atu haforsa liutan servisu ne’ebé INETL iha ona,”nia afirma.

WFP la’os apoiu iha ekipamentu de’it, maibé hakarak apoiu mós iha area kapasitasaun ba rekursu umanu iha INETL hodi halo servisu másimu liutan.

“Ami kontinua fó apoiu INETL iha servisu saida de’it, atu kapasita mós rekursu umanu nune’e halo servisu másimu liutan,” nia konklui.

Jornalista : Hortencio Sanchez

Editór         : Florencio Miranda Ximenes

iklan
iklan

Leave a Reply

iklan
error: Content is protected !!