DILI, 07 fevereiru 2024 (TATOLI) – Ministru Justisa iha ezersísiu, Paulo Remedíos, hateten Polísia Sientífika Investigasaun Kriminál ,(PCIC, sigla portuges), konklui ona prosesu investigasaun ba kazu iregularidade ne’ebé mosu iha prosesu atendindimentu ba Kaderneta Passaporte rihun16 iha Diresaun Jeral Servisu Rejistu Notariadu.
” Sim, PCIC konklui ona investigasaun ba kaderneta Passaporte 16.000 ne’ebé mai faze dahuluk. Ha’u lé ona no ha’u submete kedan relatóriu rezultadu investigasaun PCIC nian ne’e ba Primeiru-Ministru Xanana Gusmao. Nia husu ha’u atu kontinua haree didiak buat sira-ne’e hodi labele akontese tan hodi prezudika servisu institusionál”, Paulo Remediós hateten ba jornalista sira iha nia kna’ar fatin Colmera, kuarta ne’e.
Nia dehan, iha indísiu forte ba prosesu ne’e tanba semana rua de’it ba atendimentu Kaderneta Passaporte 16.000 bele hotu sedu.
“Tanba ne’e mak ita husu PCIC loke prosesu investigasaun ba kestaun ida-ne’e atu haree tanba sá mak Kaderneta Passaporte hotu lalais”, nia afirma.
“Ha’u mós lé ona rezultadu relatóriu investigasaun PCIC nian ne’e. Iha funsionáriu balun hosi notariadu nian mak ita suspeita iha investigasaun ne’e. Ha’u labele indika Deretór ka funsionáriu baibain tanba ne’e hola parte iha segredu justisa ida-ne’e, ha’u la koalia”, nia salienta.
Governante ne’e dehan, prosesu investigasaun sei kontinua tanba tempu badak sei husu PCIC atu mantein halo investigasaun ba kazu ne’e.
“Ha’u labele dehan bainhira mak atu kontinua kazu ne’e, maibé iha tempu badak nia-laran ha’u sei husu PCIC hodi kontinua prosesu investigasaun ba kazu ne’e. Imi sei hatene sé mak envolve kazu ne’e, imi sei hatene, ha’u husu ita hotu akompaña de’it”, nia konklui.
Notísia relevante : CAC averigua emisaun Passaporte 16.000 iha faze dahuluk
Suspeita iha irregularidade emisaun Passaporte rihun 16 iha faze dahuluk
Jornalista: Natalino Costa
Editór : Zezito Silva
