iklan

EKONOMIA, HEADLINE, MUNISÍPIU, OÉ-CUSSE (RAEOA)

PA RAEOA sei rezolve saláriu tratorista sira iha Oé-Cusse

PA RAEOA sei rezolve saláriu tratorista sira iha Oé-Cusse

PA RAEOA vizita tratór sira iha sentru agrikultura Senjata, suku Lifau, sub-rejiaun Pante Makassar. Imajen Tatoli/Abílio Elo Nini.

OÉ-CUSSE, 08 fevereiru 2024 (TATOLI) – Prezidente Autoridade Rejiaun Administrativa Espesiál Oe-Cusse (RAEOA), Rogério Tiago Lobato, promete rezolve problema saláriu ba funsionáriu tratorista sira iha Diresaun Rejionál Agrikultura tanba funsionáriu hirak-ne’e servisu ho profisionál liuhosi kuida tratór ho di’ak.

Prezidente Autoridade RAEOA ne’e triste tanba rona saláriu ba tratorista sira la sufisiénte hodi responde nesesidade família, nune’e nia orienta Sekretária Rejionál Agrikultura, atu prosesa hodi hasa’e saláriu.

Eis Ministru Interiór ne’e hakfodak tanba funsionáriu sira servisu besik tinan 14 ona, maibé sira-nia saláriu nafatin de’it.

Nia esplika, iha funsionalizmu públiku iha progresaun ba karreira, kuandu servisu tinan barak, saláriu tenke hasa’e.

“Ne’e injustisa boot ba ema sira-ne’e, sira iha feen no oan maibé saláriu $171 de’it, ne’e atu moris oinsá, ne’ebé ha’u ko’alia ona ho Sekretária Rejionál Agrikultura atu haree asuntu ida-ne’e, atubele hasa’e sira-nia osan, tanba sira ne’e merese,” nia subliña.

“Ita tenke hakru’uk no fó respeita ba sira-nia servisu, sira-nia dedikasaun ba profisaun hanesan tratorista, maibé ita labele rekoñese no hakruk de’it ba sira-nia dedikasaun, dedikasaun ne’e mós tenke iha méritu no iha mós rekompensa,” nia katak.

Manutensaun ba tratór

“Ha’u haree tratór sira, ita sorte di’ak tanba tratór sira barak mak sei di’ak, maibé ita tenke halo manutensaun, tanba tratór sira-ne’e simu kedas iha 2009, sei to’o agora tratór sira-ne’e aat natoon de’it, tratorista sira iha-ne’e servisu ho profisionalizmu,” Rogério Tiago Lobato apresia.

Notísia relevante: MAP RAEOA identifika kondisaun tratór molok halo leilaun

Nia informa, tratór sira aat oituan de’it, tratór hanesan ema hanesan karreta bainbain, presiza bee-moos, presiza mina, tenke troka oleu, sei liutiha tinan barak hanesan ne’e maka tratór aat uitoan de’it, ema sira konta ba tratór ne’e sira kuidadu tratór ho di’ak.

Sentru Agrikultura Senjata, suku Lifau, sub-rejiaun Pante Makassar, ne’ebé nu’udar ofisiona ba tratór sira. Imajen Tatoli/Abílio Elo Nini.

Responsável Mekanizasaun  iha Diresaun Rejionál Agrikultura, Luís Manuel da Silva, relata dezde 2009 Governu oferese tratór hamutuk 21,  maibé 18 maka daudaun hala’o hela operasaun no unidade tolu aat totál.

“Kondisaun tratór sira, roda to’o ohin loron seidauk troka, ne’ebé ohin ha’u hato’o ba Prezidente Autoridade, sei bele Governu ida-ne’e, tau matan ba tratór sira, tanba dezde  Governu fó mai iha unidade 21, maibé agora funsiona iha 18, tolu (3) mak aat, no tratorista sira durante ne’e ho saláriu ki’ik,” nia katak.

Notísia relevante: Tratór 14 hosi Oe-Cusse hahú fila-rai iha suku neen ba époka 2023

Entretantu, totál tratorista sira-ne’ebé durante ne’e hala’o servisu iha diresaun rejionál agrikultura, hamutuk na’in-28.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!