iklan

EDUKASAUN, HEADLINE, MUNISÍPIU, OÉ-CUSSE (RAEOA)

Eskola Agríkola Oé-Cusse presiza mobiliáriu no profesór atu haforsa ensinu no aprendizajen

Eskola Agríkola Oé-Cusse presiza mobiliáriu no profesór atu haforsa ensinu no aprendizajen

Sekretária Rejionál bá Asuntu Agrikultura, Filomena Sila hala’o vizita ofisiál ba Eskola Agríkola Oe-Cusse. Imajen Mídia Agrikultura.

OÉ-CUSSE, 09 fevereiru 2024 (TATOLI) – Eskola Tékniku Agríkola Kay Rala Xanana Gusmão, ne’ebé lokaliza iha suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), presiza mobiliáriu no aumenta profesór atu haforsa ensinu no aprendizajen.  

Diretór Eskola Agríkola Oé-Cusse, Jose Kehi,  hato’o problema ne’e iha ámbitu vizita ofisiál hosi Sekretária Rejionál bá Asuntu Agrikultura, Filomena Sila, nu’udar vizita dahuluk hafoin simu pose nu’udar membru Autoridade RAEOA.

Dirijente Eskola Agríkola ne’e agradese ba Sekretária Rejionál Agrikultura ho nia ékipa, tanba konsege vizita eskola refere, hodi rona preokupasaun hosi profesór sira, no haree direita kondisaun eskola  ne’ebé maka tinan barak ona eskola ne’e enfrenta.

“Ami iha-ne’e problema prinsipál haat, primeiru ami presiza mobiliáriu meza no kadeira, tanba menus, profesór nian ida-ne’e ami presiza aumenta, depois kondisaun dormitóriu ba estudante sira mós aat ona, ne’ebé ami husu ba autoridade bele konsidera,” José kehi, relata iha ámbitu vizita ofisiál ne’e.

Nia informa, eskola téknika Agrikola Oé-Cusse, estabelese iha tinan 2012, maibé  to’o ohin loron seidauk halo manutensaun, tán ne’e esperansa ba Augtoridade foun bele tau matan.

“Iha-ne’e ami-nia profesór hanorin hamutuk na’in-14 de’it, ne’ebé ladún to’o atu hanorin estudante sira hamutuk 121, maka daudaun hala’o hela estudu iha-ne’e,” nia informa.

Hatán ba preokupasaun ne’e, Sekretária Rejionál bá Asuntu Agrikultura, Filomena Sila,  hateten, problema hirak-ne’e parte Gabinete rejista no sei hato’o ba Prezidente Autoridade, nune’e bele buka solusaun.

“Objetivo hosi visita ofisiál ne’e atu haree direitamente situasaun reál ne’ebé mak akontese iha eskola refere, nune’e bele buka solusaun ba servisu hirak-ne’ebé mak durante ne’e enfrenta, problema hirak-ne’e, ha’u sei hato’o ba Prezidente Autoridade nune’e buka solusaun,” nia katak.

Notísia relevante:Funsionáriu 86 iha agrikultura Oé-Cusse servisu ho voluntáriu  

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!